Ես եպիսկոպոսների մեջ նստում եմ որպես մեղավոր․ Փաշինյան. ՏԵՍԱՆՅՈՒԹ

«Սա իրական Հայաստանն է, և Հայաստանի Հանրապետությունը մեր երազանքների պետությունն է։ Ես ասել եմ, որ 2021 թվին մենք ասում էինք, որ ապագա կա, այսօր ասում ենք, որ ապագան այսօր է։ Եվ երբ որ մենք նայում ենք Հայաստանի տնտեսական ցուցանիշները, երբ որ մենք նայում ենք Հայաստանի միջազգային հեղինակությունը, երբ որ նայում ենք Հայաստանում և նրա շուրջ տարածաշրջանում հաստատված խաղաղությունը, ըստ էության, այո, դա այն խնդիրն էր, որը մենք 2021 թվականին ուզում էինք լուծել և մենք լուծել ենք այդ խնդիրը։ Եվ այդ խնդրի լուծումը ակնհայտ է»,-այս մասին լրագրողների հարցին ի պատասխան նշեց վարչապետ Նիկոլ Փաշինյանը։

Այնուհետև նա անդրադարձավ Նավասարդ արքեպիսկոպոս Կճոյանին և նրա հետ կապված հայտնի օֆշորային սկանդալին։ Փաշինյանից հետաքրքրքվեցին՝ իր ձևակերպմամբ «Բենթլի Սամոյի» հե՞տ է պատրաստվում բարենորոգել եկեղեցին։

«Նոր Կտակարանում այսպիսի մի դրվագ կա։ Երբ որ փարիսեցիները և սադուկեցիները տեսան, որ Հիսուսը մաքսավորների և մեղավորների հետ է նստում, սկսեցին նրա աշակերտներին մոտավորապես նույն հարցերը տալ, ինչ-որ դուք եք տալիս։ Եվ երբ որ աշակերտները դրա մասին ասացին Հիսուս Քրիստոսին, Հիսուսը ասաց. «Առողջներին բժիշկ պետք չի, և անմեղների համար չեմ եկել, այլ մեղավորների համար եմ եկել»։ Հիմի մեզնից յուրաքանչյուրը, այստեղ էլի ուշադրություն դարձրեք, ես հանկարծ չվերապահվի, թե մենք այդ սեղանի շուրջ նստած որևէ մեկին Հիսուսի դերակատարում ենք վերապահում, մյուսներին՝ մեղավորի դերակատարում ենք վերապահում։

Հայաստանյայց Առաքելական Սուրբ Եկեղեցու ցանկացած հետևորդ, ինքը պետք է գիտակցի երկու բան, որ ինքը մեղավոր է, և մյուս կողմից, եթե ինքը Հիսուս Քրիստոսի իրական հետևորդ է, ինքը նաև Հիսուս Քրիստոսի գործելակերպի, վարվելակերպի, խոսույթի տրամաբանության և առաքելության մեջ է։ Ես եպիսկոպոսների մեջ նստում եմ որպես մեղավոր»,-ասաց նա։

Մանրամասները՝ տեսանյութում։