04.04.2026 | 20:03
ՃՏՊ՝ հրդեհի բռնկմամբ
Ցույցերի 12-րդ օրը Իրանում. քրդական ընդդիմությունը համընդհանուր գործադուլի կոչ է անում
Քաղաքականություն
08.01.2026 | 13:12
Իրանի մայրաքաղաք Թեհրանի մոտակայքում բողոքի ցույցերի 12-րդ օրը անկարգությունների ժամանակ դանակահարության հետևանքով ոստիկան է սպանվել։ Այս մասին գրում է France 24-ը՝ վկայակոչելով իրանական լրատվամիջոցներին։
Շահին Դեհղանը, որը Թեհրանից արևմուտք գտնվող Մալարդ շրջանում ոստիկանական ուժերի անդամ էր, «նահատակվել է անկարգությունները զսպելու ջանքերի ժամանակ դանակահարվելու հետևանքով», հաղորդում է Fars լրատվական գործակալությունը։
Իրանում անկարգությունները սկսվել են դեկտեմբերի 28-ին, երբ Թեհրանում առևտրականները բողոքի ակցիա էին կազմակերպել գների բարձրացման և ռիալի անկման դեմ, ինչը նմանատիպ ակցիաների ալիք է առաջացրել երկրի այլ քաղաքներում։ Պաշտոնական հայտարարությունների և տեղական լրատվամիջոցների վրա հիմնված AFP-ի հաշվարկի համաձայն՝ ցույցերը տարածվել են Իրանի 31 նահանգներից 25-ում, տասնյակ մարդիկ են զոհվել, այդ թվում՝ անվտանգության ուժերի ներկայացուցիչներ։
Իրաքում գործող մի քանի քրդական ընդդիմադիր կուսակցություններ կոչ են արել հինգշաբթի համընդհանուր գործադուլ անցկացնել Իրանում՝ ի պաշտպանություն բողոքի ցույցերի, հայտնել է արտաքսված կուսակցություններից մեկի ներկայացուցիչն AFP-ին։
Կոմալա կուսակցությունը, որն Իրաքում գործող իրանցի քրդերի անջատողական խմբավորում է, և որին Թեհրանը համարում է ահաբեկչական կազմակերպություն, չորեքշաբթի հայտարարել է գործադուլի մասին։
«Յոթ քրդական ընդդիմադիր կուսակցություններ կոչ են արել համընդհանուր գործադուլի։ Այս կոչի նպատակն է՝ ցույց տալ քրդական ժողովրդի միասնական աջակցությունը Իրանի ժողովրդի կողմից Իսլամական Հանրապետության դեմ մղվող պայքարին և բողոքի ցույցերին»,- AFP-ին ասել է Կոմալայի կենտրոնական կոմիտեի անդամ Հասան Ռահմանփանահը։
Նա նաև Իրանի իշխանություններին մեղադրել է ցուցարարների դեմ «դաժան և հանցավոր հարձակումների» մեջ։
Թարգմանությունը՝ Էմմա Չոբանյանի
