30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Վենեսուելայի իշխանությունները հայտնել են ԱՄՆ-ի հարձակման հետևանքով 100 մարդու մահվան մասին
Քաղաքականություն
08.01.2026 | 12:41
ԱՄՆ-ի կողմից Վենեսուելայի վրա երկրի նախագահ Նիկոլաս Մադուրոյին առևանգելու նպատակով իրականացված հարձակումը խլել է առնվազն 100 մարդու կյանք։ Այս մասին հայտարարել է երկրի ներքին գործերի նախարար Դիոսդադո Կաբելյոն, գրում է CNN-ը։
«Մինչև հիմա կա 100 զոհ, 100։ Եվ նույնքան վիրավորներ։ Մահացել են մարդիկ, ովքեր որևէ կապ չեն ունեցել հակամարտության հետ, քաղաքացիական անձինք, կանայք, ովքեր իրենց տներում էին… տուժել են մեր երկրի դեմ արձակված հզոր ռումբերի հարվածից»,- հայտարարելե է Կաբելյոն։
Կուբայի կառավարությունը, իր հերթին, կիրակի հայտարարել էր, որ «մարտական գործողությունների» ժամանակ զոհվել է իր 32 քաղաքացի, որոնք առաջադրանքներ էին կատարում Կուբայի զինված ուժերի և ներքին գործերի նախարարության անունից: Կաբելյոն չի մանրամասնել՝ արդյո՞ք մահացած կուբացիները 100 զոհերի թվում են։
ԱՄՆ նախագահ Դոնալդ Թրամփը նախկինում հայտարարել էր, որ ոչ մի ամերիկացի զինծառայող չի զոհվել, չնայած որոշները վիրավորվել են հարձակման ժամանակ ուղղաթիռի խոցման հետևանքով։
Միացյալ Նահանգները հունվարի լույս 3-ին գործողություն էր իրականացրել Վենեսուելայում՝ ավիահարվածներ հասցնելով Կարակասի տարբեր թիրախների: Արդյունքում, ամերիկյան հատուկ նշանակության ուժերը երկրից դուրս էին բերել Վենեսուելայի նախագահ Նիկոլաս Մադուրոյին և նրա կնոջը՝ Սիլիա Ֆլորեսին: Նրանք ինքնաթիռով տեղափոխվել են Նյու Յորք, որտեղ ներկայացել են դատարան: Նրանց տարբեր մեղադրանքներ են առաջադրվել, այդ թվում՝ թմրամիջոցների ահաբեկչության և զենքի պահպանման համար: Մադուրոն և կինը իրենց մեղավոր չեն ճանաչել:
Թարգմանությունը՝ Էմմա Չոբանյանի
