Ճնշումները կշարունակվեն՝ ՀՀ-Իրան հարաբերությունները նվազագույնի հասցնելու համար. Կիրո Մանոյան․ ՏԵՍԱՆՅՈՒԹ

Հայաստանի նկատմամբ ճնշումները կշարունակվեն, որպեսզի Իրանի հետ հարաբերությունները նվազագույնի հասնեն: Այսօր՝ նոյեմբերի 7-ին լրագրողների հետ հանդիպմանը նման կարծիք հայտնեց ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը:

«Իրանի հետ կապված խնդիրները մտահոգիչ են: Այն պատժամիջոցները, որոնք ԱՄՆ-ն առանձնաբար սահմանում է Իրանի նկատմամբ, չի կիսում նաև ԵՄ-ն: Սակայն ԱՄՆ-ն նման որոշում է կայացրել՝ ինչ-ինչ հաշվարկներից ելնելով»,- նշեց Կիրո Մանոյանը՝ հավելելով, որ ԱՄՆ նախագահի ազգային անվտանգության հարցերով խորհրդական Ջոն Բոլթոնի այցի նպատակից մեկն այդ հարցով տարածաշրջանի երկրներին զգուշացնելն էր: Մանոյանը կարծում է նաև, որ ԱՄՆ-ում անցկացված միջանկյալ ընտրությունների արդյունքում Կոնգրեսի Ներկայացուցիչների պալատում մեծամասնություն ստացած դեմոկրատները կփորձեն որոշակի քայլերի դիմել՝ ինչ-որ չափով այդ պատժամմիջոցները մեղմացնելու համար. «Ոչ թե այն պատճառով, որ դեմոկրատներն Իրանի նկատմամբ ավելի մեղմ են, այլ պարզապես, որպեսզի Միացյալ Նահանգներն աշխարհում ինքն իրեն չմեկուսացնի այդ հարցով»: Իսկ ի՞նչ պետք է անեն Հայաստանի իշխանություններն այս իրավիճակում. Կիրո Մանոյանը կարծում է՝ պետք է ԱՄՆ-ին բացատրել, որ Հայաստանի այլընտրանքը մեծ չէ: «Չի կարելի միաժամանակ և՛ գոհացնել ԱՄՆ-ին, և՛ շարունակել հարաբերություններն Իրանի հետ: Պարզապես մենք պետք է անընդհատ բացատրենք: Այս դեպքում կարևոր դերակատարություն ունի նաև ԱՄՆ-ի հայ համայնքը, որպեսզի իշխանություններին բացատրի, որ Հայաստանը շատ այլընտրանք չունի»,- հավելեց Կիրո Մանոյանը:

Մանրամասները՝ տեսանյութում։