Սիրիական բանակի կողմից սկսված հրետակոծությունից հետո խաղաղ բնակիչները փախչում են Հալեպի քրդական թաղամասերից

Սիրիական բանակը չորեքշաբթի սկսել է հրետակոծել Հալեպի քրդաբնակ թաղամասերը, այն բանից հետո, երբ քաղաքացիական անձանց տարածքը լքելու համար տրված վերջնաժամկետը լրացել է։ Այս մասին հայտնել է AFP-ի թղթակիցը, գրում է France 24– ը։

Զինվորականները քաղաքի՝ քրդերի կողմից վերահսկվող շրջանները հայտարարել էին «փակ ռազմական գոտի» ժամը 15:00-ից (12:00 GMT), միաժամանակ, ստեղծելով «երկու անվտանգ մարդասիրական անցակետեր», որոնցով հազարավոր խաղաղ բնակիչներ փախել են վերջնաժամկետից առաջ։

Երեքշաբթի սկսված մահացու բախումներն ամենալուրջն են երկու կողմերի միջև, որոնք մինչ օրս չեն կարողացել իրականացնել նախորդ տարվա մարտի համաձայնագիրը՝ քրդերի կիսաինքնավար վարչակազմը և բանակը միավորելու Սիրիայի նոր իսլամիստական ​​կառավարությանը։

AFP-ի թղթակիցները Հալեպում տեսել են ընտանիքների մեծ խմբեր, որոնք երեխաներով լքել են թաղամասերը՝ իրենց իրերը տանելով։

«Հալեպի Շեյխ Մաքսուդ և Աշրաֆիե թաղամասերում գտնվող Սիրիայի դեմոկրատական ​​ուժերի բոլոր ռազմական դիրքերն օրինական ռազմական թիրախներ են»,- հայտարարել է սիրիական կառավարական բանակը՝ անդրադառնալով քրդերի գլխավորած ուժերին։

Քուրդ բարձրաստիճան պաշտոնյա Իլհամ Ահմեդը Դամասկոսին մեղադրել է քրդերի դեմ «ցեղասպանական պատերազմ» սկսելու մեջ՝ կոչ անելով Սիրիայի կառավարությանը «հետապնդել բանականության ուղին՝ խնդիրները երկխոսության միջոցով լուծելու համար»։

Բռնության պատճառով դադարեցվել են Հալեպի օդանավակայանից և դեպի այնտեղ չվերթները, փակվել են դպրոցները, համալսարանները, պետական գրասենյակները։

Երեքշաբթի օրվա բախումների ժամանակ զոհվել է 9 մարդ, որոնց մեծ մասը՝ քաղաքացիական անձինք։ Երկու կողմերն էլ միմյանց մեղադրում են մարտական ​​գործողությունները սկսելու համար։

53-ամյա տնային տնտեսուհի, սիրիական թաղամասի բնակիչ Ջուդ Սերժիանն ասել է, որ բռնությունը «հիշեցրել է պատերազմի մասին»։

«Մենք գնալու ուրիշ տեղ չունենք, այնպես որ՝ կմնանք մեր տանը»,- ասել է Աշրաֆիեի մոտակայքում գտնվող սիրիական թաղամասում ապրող Սերժիանը։

Դամասկոսում քրդերի ինքնավար վարչակազմի ներկայացուցիչ Աբդուլ Քարիմ Օմարն AFP-ին ասել է, որ Հալեպի քրդաբնակ թաղամասերն «ամբողջովին պաշարված են»։ Նա հերքել է լուրերը, որ այս տարածքներից որևէ արկ է արձակվել՝ պնդելով, որ դրանք վերահսկվում են քրդերի «Ասայիշ» ներքին անվտանգության ուժերի կողմից, «որոնք ունեն միայն թեթև զենքեր»։

SDF-ը վերահսկում է Սիրիայի նավթով հարուստ հյուսիսային և հյուսիսարևելյան շրջանների մեծ մասը՝ ԱՄՆ-ի գլխավորած միջազգային կոալիցիայի աջակցությամբ, և կարևոր դեր է խաղացել 2019 թվականին Սիրիայում «Իսլամական պետություն» ահաբեկչական խմբավորման պարտության մեջ։

Քրդական իշխանության՝ սիրիական պետությաննինտեգրման վերաբերյալ մարտյան համաձայնագիրը պետք է իրականացվեր մինչև 2025 թվականի վերջը։ Քրդերը պնդում են ապակենտրոն կառավարման հարցում, ինչը Սիրիայի նոր իշխանությունները մերժել են։

Թարգմանությունը՝ Էմմա Չոբանյանի