28.07.2026 | 23:02
«Կարևոր է ակտիվացնել դիվանագիտական գործընթացը»․ Զելենսկին՝ Թրամփի հետ հանդիպման արդյունքների մասին
Ռուսաստանը Discord-ի միջոցով ՀԱՀ-ի քաղաքացիների է հավաքագրել Ուկրաինայի դեմ կռվելու համար
Քաղաքականություն
07.01.2026 | 18:35
Ռուսաստանը Հարավաֆրիկյան Հանրապետության քաղաքացիների է հավաքագրել Ուկրաինայում կռվելու համար՝ օգտագործելով Discord-ը՝ հայտնի խաղային հարթակ։ Այս մասին գրում է Bloomberg-ը՝ հղում անելով երկու տղամարդկանց և հավաքագրման գործընթացին ծանոթ մեկ անձի հավաքագրմանը վերաբերող փաստաթղթերին, գրում է Current time-ը։
Գործակալության տվյալներով՝ շուրջ 20 տարեկան երկու հարավաֆրիկացիներ պարբերաբար Discord են օգտագործել Arma 3 խաղալիս։ @Dash անունով օգտատիրոջ հետ շփվելուց հետո տղամարդիկ հանդիպել են Քեյփթաունում և այցելել Ռուսաստանի հյուպատոսություն։ 2024 թվականի հուլիսին նրանք ԱՄԷ-ով մեկնել են Ռուսաստան, որտեղ հանդիպել են @Dash-ին։ Սեպտեմբերին երկու տղամարդիկ մեկ տարվա պայմանագրեր են կնքել Ռուսաստանի Պաշտպանության նախարարության հետ և մեկնել Ուկրաինայում պատերազմի։
Մի քանի շաբաթ տևած նախնական պատրաստությունից հետո նրանցից մեկն ուղարկվել է Ուկրաինայի ռազմաճակատ։ Վերջին անգամ նա իր ընտանիքի հետ կապ է հաստատել 2024 թվականի հոկտեմբերի 6-ին, իսկ դեկտեմբերի 17-ին նրա ընկերն ընտանիքին տեղեկացրել է նրա մահվան մասին։ Ընտանիքի ստացած վկայականում նշված է, որ նա մահացել է ծառայողական պարտականությունները կատարելիս 2024 թվականի հոկտեմբերի 23-ին Ուկրաինայի Լուգանսկի շրջանում։
Գործակալության աղբյուրը հայտնել է, որ գումարից բացի՝ Ռուսաստանի իշխանությունները նրանց խոստացել են Ռուսաստանի քաղաքացիություն և կրթություն երկրում։
2024 թվականի նոյեմբերի սկզբին հայտնի էր դարձել, որ Հարավաֆրիկյան Հանրապետության իշխանությունները փորձում են Ուկրաինայի առաջնագծից վերադարձնել 17 քաղաքացիների: Կառավարության հայտարարության մեջ նշվում էր, որ 20-ից 39 տարեկան տղամարդիկ «թակարդի մեջ են Ուկրաինայի պատերազմից տուժած Դոնբասի շրջանում», և նրանց հարազատները տագնապ են բարձրացնում: Bloomberg-ի տվյալներով՝ Հարավաֆրիկյան Հանրապետության և Բոտսվանայի քաղաքացիներին հավաքագրողներից մեկը նախկին նախագահի դուստրն է՝ խորհրդարանի անդամ Դուդուզիլա Զումա-Սամբուդլան: Նա տղամարդկանց առաջարկել է Ռուսաստանում վերապատրաստվել, իբր, իր կուսակցությունում թիկնապահներ աշխատելու համար:
Անցյալ տարվա օգոստոսին Հարավային Աֆրիկայի իշխանություններն արդեն զգուշացրել էին երիտասարդներին՝ չընդունել «կեղծ աշխատանքային առաջարկներ Ռուսաստանում»։ Այնուհետև պարզվել էր, որ կանայք, որոնք արձագանքել էին սոցիալական ցանցերում նման հայտարարություններին, ի վերջո, ուղարկվել են Թաթարստանի Ալաբուգայի գործարան՝ իրանական «Շահեդ» անօդաչու թռչող սարքեր հավաքելու։
Թարգմանությունը՝ Էմմա Չոբանյանի
