Պենտագոնի ղեկավարը կատակել է Վենեսուելայում ռուսական ՀՕՊ համակարգերի մասին

ԱՄՆ պատերազմի նախարար Փիթ Հեգսեթը կատակել է Նիկոլաս Մադուրոյի ձերբակալության ընթացքում վենեսուելական զորքերի կողմից ամերիկյան ավիացիայի հարվածները հետ մղելու փորձերի բացակայության մասին:

Հունվարի 5-ին Վիրջինիայի նավաշինարանում զինվորների հետ հանդիպման ժամանակ Հեգսեթը պարծեցել է, որ ամերիկացիներին հաջողվել է առանց կորուստների մտնել Կարակաս, գրում է DW-ի ռուսական ծառայությունը։

«Երեք գիշեր առաջ Վենեսուելայում մեր լավագույն ամերիկացիներից շուրջ 200-ը մտան Կարակասի կենտրոն», – ընդգծել է Հեգսեթը՝ նշելով, որ գործողությունը տեղի է ունեցել առանց գեթ մեկ ամերիկացի զինծառայողի զոհվելու։

«Կարծես թե այդ ռուսական ՀՕՊ համակարգերը լավ չեն աշխատել, այնպես չէ՞», – կատակել է նա։

Լրատվամիջոցների հաղորդագրությունների համաձայն՝ Ռուսաստանը դարձել է Վենեսուելայի զենքի հիմնական մատակարարներից մեկը 2000-ականների կեսերից։ Այս ոլորտում պայմանագրերի ընդհանուր արժեքը կազմել է մոտավորապես 14,5 միլիարդ դոլար, ընդ որում՝ Ռուսաստանի իշխանությունները թույլ են տվել Կարակասին վարկով ձեռք բերել սարքավորումներ և հետաձգել վճարման ժամկետները։

Ռուսաստանից Վենեսուելա մատակարարվել են ինքնաթիռներ, ուղղաթիռներ, ՀՕՊ համակարգեր, այդ թվում՝ C-300, արդիականացված խորհրդային Pechora-2M ՀՕՊ համակարգեր և Իգլա շարժական ՀՕՊ համակարգեր։

2025 թվականի մայիսին Նիկոլաս Մադուրոն այցելել էր Մոսկվա, որտեղ ռազմավարական գործընկերության համաձայնագիր էր ստորագրել Ռուսաստանի նախագահ Վլադիմիր Պուտինի հետ։

Փաստաթուղթը, ի թիվս այլ բաների, նախատեսում էր ռազմատեխնիկական համագործակցություն՝ «երկու երկրների պաշտպանունակության ամրապնդման և անվտանգության ապահովման նպատակով»։

Ելույթի ժամանակ Փիթ Հեգսեթը հայտարարել է, որ Միացյալ Նահանգները չի ձգտում հակամարտության այլ երկրների հետ, սակայն աշխարհը մտել է «գերտերությունների մրցակցության նոր դարաշրջան»։

Այս համատեքստում Պենտագոնի ղեկավարը հիշատակել է Չինաստանին։ Հեգսեթի խոսքով՝ ԱՄՆ-ն «կձգտի դիմակայել այս մարտահրավերին» և իր պաշտպանական ոլորտում կներառի «ապագա պատերազմներում գերիշխելու համար անհրաժեշտ» տեխնոլոգիաները։

Թարգմանությունը` Էմմա Չոբանյանի