30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Առնվազն 35 զոհ, 1200 ձերբակալված․ Իրանում բողոքի ակցիաները շարունակվում են
Քաղաքականություն
06.01.2026 | 13:28
Իրանում բողոքի ցույցերի հետ կապված բռնության զոհերի թիվը հասել է առնվազն 35-ի, գրում է AP-ը։ Այս թիվը հրապարակել է ԱՄՆ-ում գործող Human Rights Activists News Agency-ն, որը հայտնել է, որ մեկ շաբաթից ավելի շարունակվող բողոքի ցույցերի ընթացքում ձերբակալվել է ավելի քան 1200 մարդ։
Հաղորդվում է, որ սպանվել է 29 ցուցարար, 4 երեխա և Իրանի անվտանգության ուժերի 2 ներկայացուցիչ։ Ցույցերն ընդգրկել են Իրանի 31 նահանգներից 27-ի ավելի քան 250 բնակավայրերում։
Տեղական «Ֆարս» լրատվական գործակալությունը հայտնել է, որ ցույցերի ժամանակ վիրավորվել է մոտ 250 ոստիկան և պահապանների կորպուսի «Բասիջ» կամավորական ուժերի 45 անդամ։
Զոհերի թվի աճին զուգահեռ աճում է ամերիկյան միջամտության հավանականությունը: ԱՄՆ նախագահ Դոնալդ Թրամփը ուրբաթ օրը զգուշացրել էր Իրանին, որ եթե Թեհրանը «բռնի կերպով սպանի խաղաղ ցուցարարներին», Միացյալ Նահանգները «կգա նրանց օգնության»: Իրանի պաշտոնյաները միջամտության դեպքում սպառնացել են թիրախավորել Մերձավոր Արևելքում գտնվող ամերիկյան զորքերը։
Բողոքի ցույցերը Իրանում ամենաընդգրկունն են 2022 թվականից ի վեր, երբ մահացավ կալանքի տակ գտնվող 22-ամյա Մահսա Ամինին։ Շաբաթ օրը Գերագույն առաջնորդ այաթոլլահ Ալի Խամենեին հայտարարել էր, որ «ապստամբները պետք է իրենց տեղը դրվեն»։
Թարգմանությունը` Էմմա Չոբանյանի
