03.04.2026 | 00:12
Վարդան Ղուկասյանի որդու խափանման միջոցը փոխվել է. նա տնային կալանքի տակ է
Թրամփը կոչ է արել ամերիկյան նավթային ընկերություններին աշխատել Վենեսուելայում
Քաղաքականություն
06.01.2026 | 11:44
Ամերիկյան նավթային ընկերությունները կարող են օգնել Վենեսուելայի նավթային ենթակառուցվածքների վերանորոգմանը և արդիականացմանը՝ ԱՄՆ կառավարության կողմից սուբսիդիաների դիմաց։ Այս գաղափարը հնչեցրել է ԱՄՆ նախագահ Դոնալդ Թրամփը NBC News-ին տված հարցազրույցում, գրում է DW-ի ռուսական ծառայությունը։
Թրամփը կարծում է, որ ամերիկյան ընկերությունները կարող են ավարտել Վենեսուելայում նավթի արդյունահանման ընդլայնման նախագիծը 18 ամսվա ընթացքում։
Սակայն դա կպահանջի «զգալի գումարի ծախս»։ Այնուամենայնիվ, Վենեսուելա մտնող ընկերությունները «այդ դեպքում կստանան փոխհատուցում մեզանից կամ իրենց եկամուտներից», հայտարարել է Դոնալդ Թրամփը։
Հունվարի 5-ին Reuters-ը հաղորդել էր, որ ԱՄՆ խոշոր նավթային ընկերությունները՝ Exxon Mobil-ը, ConocoPhillips-ը և Chevron-ը, դանդաղ են արձագանքում Թրամփի՝ Վենեսուելայում իրենց գործունեությունը ընդլայնելու կոչին։
Ոլորտային վերլուծաբանները Reuters-ին հայտնել են, որ ամերիկացի խաղացողների վերադարձը Վենեսուելա կխոչընդոտվի ինչպես տեղական ենթակառուցվածքների բացակայության և վատթարացման, այնպես էլ երկրի քաղաքական ապագայի վերաբերյալ անորոշության պատճառով։
Վենեսուելայում ամերիկյան նման ներկայության իրավական հիմքը և Վաշինգտոնի երկարաժամկետ քաղաքականությունը այս ոլորտում ԱՄՆ ռազմական գործողությունից հետո մնում են անորոշ։
ԱՄՆ ռազմական գործողությունից և Նիկոլաս Մադուրոյի գերեվարումից հետո, Վենեսուելայի նախկին փոխնախագահ Դելսի Ռոդրիգեսը ստանձնել է նախագահի պաշտոնակատարի պարտականությունները։ Սակայն, ըստ երկրի Սահմանադրության, ժամանակավոր առաջնորդը պետք է 30 օրվա ընթացքում նշանակի նոր նախագահական ընտրություններ։ Թրամփը, սակայն, պնդում է, որ դա տեղի չի ունենա։
«Նախ, մենք պետք է երկիրը վերադարձնենք ճիշտ ուղու վրա։ Մենք չենք կարող ընտրություններ անցկացնել», – ասել է Թրամփը NBC News-ին տված հարցազրույցում։
Մադուրոյի գերեվարումից հետո արված իր հայտարարություններում Ռոդրիգեսը շեշտել է իր հավատարմությունը նրան և կոչ արել Միացյալ Նահանգներին «խաղաղության և համագործակցության»։ Իր հերթին, Թրամփը սպառնացել է, որ Ռոդրիգեսը «ծանր գին» կվճարի, եթե չհամագործակցի Վաշինգտոնի հետ։
Թարգմանությունը` Էմմա Չոբանյանի
