ԱՄՆ-ը վերացրել է Կարիբյան ավազանում թռիչքների սահմանափակումները

ԱՄՆ-ն վերացրել է Կարիբյան ավազանում թռիչքների սահմանափակումները, որոնք ավելի վաղ մտցվել էին Վենեսուելայում իրականացվող ռազմական գործողությունների կապակցությամբ։ Այս մասին հայտնել է ԱՄՆ տրանսպորտի նախարար Շոն Դաֆին՝ սոցիալական ցանց X-ում, փոխանցում է DW-ն։

«Կարիբյան ավազանի օդային տարածքում նախնական սահմանափակումների ժամկետը լրանում է Արևելյան ափի ժամանակով 12:00-ին (Երևանի ժամանակով՝ 09:00), և թռիչքներն արդեն կարող են վերսկսվել»,-նշված է գրառման մեջ։

ԱՄՆ-ի Դաշնային ավիացիոն վարչությունը (FAA) հունվարի 3-ին արգելել էր ամերիկյան առևտրային ինքնաթիռներին թռչել ցանկացած բարձրությամբ Վենեսուելայի տարածքի վրայով, հիշեցնում էր The New York Times-ը։

FAA-ն նույն օրը հայտարարել էր, որ արգելքը պայմանավորված է «շարունակվող ռազմական գործողություններով» կապված անվտանգության ռիսկերով։ Ծանուցումն ուժի մեջ էր մտել 23 ժամով՝ հունվարի 3-ի 02:00-ին վենեսուելական ժամանակով (10:00՝ երևանյան ժամանակով)։

Հիշեցնենք՝ 2026 թվականի հունվարի 3-ի գիշերը ԱՄՆ բանակը հարվածներ էր հասցրել Վենեսուելայի մայրաքաղաք Կարակասին։ ԱՄՆ նախագահ Դոնալդ Թրամփը հայտարարել էր, որ Վենեսուելայի առաջնորդ Նիկոլաս Մադուրոն և նրա կինը՝ Սիլիա Ֆլորեսը, հատուկ նշանակության «Դելտա» ստորաբաժանման կողմից ձերբակալվել են և դուրս բերվել երկրից։ Վենեսուելայում հայտարարվել էր արտակարգ դրություն։

ԱՄՆ արդարադատության նախարարության պնդմամբ՝ Մադուրոն «թույլ է տվել, որ կոռուպցիան ծաղկի և սնվի կոկայինով՝ իր, ինչպես նաև վարչակարգի ներկայացուցիչների և իր ընտանիքի անդամների շահի համար»։

ԱՄՆ-ը կղեկավարի Վենեսուելան մինչև իշխանության «անվտանգ» և «ճիշտ» անցումը, հայտարարել է Սպիտակ տան ղեկավարը մամլո ասուլիսի ընթացքում։ Մադուրոն և նրա կինը տեղափոխվել են Նյու Յորք։