Թրամփը զորքերը դուրս է բերում Չիկագոյից, Լոս Անջելեսից և Պորտլենդից

ԱՄՆ նախագահ Դոնալդ Թրամփը հայտարարել է, որ իր վարչակազմը Ազգային գվարդիան դուրս է բերում Չիկագոյից, Լոս Անջելեսից և Պորտլենդից, սակայն սոցիալական ցանցերում իր գրառման մեջ հավելել է, որ դաշնային ուժերը «կվերադառնան», եթե հանցագործությունների մակարդակը բարձրանա: Այս մասին փոխանցում է BBC-ի ռուսական ծառայությունը։

«Մենք ազգային գվարդիան դուրս ենք բերում Չիկագոյից, Լոս Անջելեսից և Պորտլենդից, չնայած այն հանգամանքին, որ հանցագործությունն այս քաղաքներում զգալիորեն նվազել է այս հոյակապ հայրենասերների ներկայության շնորհիվ, և միայն դրա շնորհիվ»,-գրել է Թրամփը:

Այս երեք քաղաքների և համապատասխան Նահանգների կառավարությունները վերահսկում են դեմոկրատները: Նրանք Թրամփի վարչակազմին մեղադրում են դաշնային լիազորությունները չարաշահելու և հիմնականում խաղաղ ակցիաների ժամանակ բռնության առանձին դեպքերը դիտավորյալ չափազանցնելու մեջ՝ զորքերի մուտքն արդարացնելու համար:

Թրամփը հայտարարել է, որ Ազգային գվարդիայի զորքեր կամ նույնիսկ բանակային ստորաբաժանումներ մեգապոլիսներ ուղարկելը անհրաժեշտ էր հանցավորության դեմ պայքարելու և դաշնային գույքն ու անձնակազմը ցուցարարներից պաշտպանելու համար:

«Մենք կվերադառնանք, հնարավոր է՝ բոլորովին այլ և ավելի ուժեղ ձևով, երբ հանցագործությունը նորից սկսի աճել, դա միայն ժամանակի հարց է»,- հավելել է նախագահը։

Վերջին ամիսներին Թրամփը զորքեր է մտցրել նաև Մեմֆիս, Նոր Օռլեան և Վաշինգտոն։ Այդ քաղաքներն իր գրառման մեջ նախագահը չի նշել։ Առնվազն դաշնային մայրաքաղաքում զորքերը շարունակում են պարեկել փողոցները, հաղորդում են BBC-ի թղթակիցները:

Անցյալ շաբաթ Գերագույն դատարանը որոշում է կայացրել, որ Թրամփը չի կարող զորքեր օգտագործել Չիկագոյում՝ առանց Իլինոյսի կառավարության համաձայնության:

Դատավորները, որոնք քննում են քաղաքային իշխանությունների կողմից զորքերի տեղակայման հետ կապված հայցերը, որոշում են կայացրել , որ նախագահի վարչակազմը գերազանցել է իր լիազորությունները և չեն գտել ապացույցներ, որոնք հաստատում են զորքերի օգտագործման անհրաժեշտությունը։