06.10.2026 | 14:23
Ռաֆինյան երկարաձգել է «Բարսելոնայի» հետ պայմանագիրը. Աղբյուր
Անկարայում և Ստամբուլում առավոտյան գործողությունների ընթացքում ԻԼԻՊ-ի 357 ահաբեկիչ է ձերբակալվել
Քաղաքականություն
30.12.2025 | 13:51
Թուրքիայի անվտանգության ուժերը Ստամբուլում և մայրաքաղաք Անկարայում համակարգված ոստիկանական գործողությունների ընթացքում ձերբակալել են ավելի քան 120 կասկածյալի։ Պաշտոնական հաղորդագրության համաձայն՝ Անկարայի գլխավոր դատախազությունը ԻԼԻՊ զինված ահաբեկչական կազմակերպության դեմ շարունակվող հետաքննության շրջանակում 17 կասկածյալի ձերբակալման հրաման է տվել, գրում է Turkiye today-ը։
Որոշումը կայացվել է նախկինում կատարված հետաքննությունների ընթացքում ձեռք բերված թվային նյութերի ուսումնասիրությունից հետո։ Վերլուծության արդյունքում բացահայտվել են կասկածյալներին հակամարտության գոտիների հետ կապող և ահաբեկչական խմբավորմանը նրանց անդամակցության մասին վկայող ապացույցներ։ Կասկածյալների թվում են 11 օտարերկրյա քաղաքացի և Թուրքիայի 6 քաղաքացի։ Բոլոր 17 կասկածյալները ձերբակալվել են։
ԻԼԻՊ-ի ահաբեկիչները դեկտեմբերի 29-ին Թուրքիայի Յալովա շրջանում հակաահաբեկչական գործողության ժամանակ սպանել էին երեք թուրք ոստիկանի։
Առանձին և ավելի լայնածավալ գործողության շրջանակում Ստամբուլի գլխավոր դատախազությունն ԻԼԻՊ -ի գործունեության դեմ ուղղված համակարգված ռեյդերի ընթացքում ձերբակալել է 110 կասկածյալի։ Անվտանգության ուժերը միաժամանակյա գործողություններ են իրականացրել Ստամբուլի և երկու այլ նահանգների 114 հասցեներում։ Վերջին թարմացման համաձայն՝ ձերբակալվել է 110 կասկածյալ, մինչդեռ մնացած կասկածյալներին գտնելու և կալանավորելու աշխատանքները շարունակվում են, ասվում է հրապարակման մեջ։
Դատախազները նշել են, որ ապացույցները ցույց են տալիս, որ Մ.Յ. անունով կասկածյալը գործել է որպես, այսպես կոչված, առաջնորդ կամ քարոզիչ՝ կազմակերպելով անօրինական կրոնական դասեր և հավաքույթներ։ Իշխանությունները հայտարարել են, որ այս գործունեությունն օգտագործվել է կազմակերպության համար կողմնակիցներ հավաքագրելու նպատակով։
Հայտարարության համաձայն՝ անօրինական աղոթատեղիներում ողորմության, բարեգործության և նվիրատվությունների անվան տակ հավաքված միջոցները, ենթադրաբար, փոխանցվել են ԻԼԻՊ-ի հետ կապված անձանց, այդ թվում՝ Սիրիայի ճամբարներում պահվողներին, և օգտագործվել են կազմակերպության հետ կապված ուսումնական և կրթական գործունեության ֆինանսավորման համար։ Հետաքննությունը նաև ներառել է Յալովայում վերջերս տեղի ունեցած հարձակման հետ կապված կասկածյալներին, Նոր տարվա շրջանում նմանատիպ հարձակումներ իրականացնելու ունակ գնահատված անձանց, կազմակերպության հետ ապացուցված կապեր ունեցող անձանց և սոցիալական ցանցերում ԻԼԻՊ-ի քարոզչություն տարածելու մեջ մեղադրվող այլ անձանց։
Բացի այդ, իշխանությունները նույնականացրել են Թուրքիայի ներգաղթի և ահաբեկչության դեմ պայքարի օրենքներով դասակարգված օտարերկրյա ահաբեկչական զինյալներին՝ նշելով նրանց կապը հակամարտության գոտիների հետ և ազգային անվտանգությանը սպառնացող վտանգի կարգավիճակը։ Կասկածյալների բնակարանների խուզարկությունների ժամանակ ոստիկանությունն առգրավել է բազմաթիվ թվային նյութեր և կազմակերպչական փաստաթղթեր։ Դրանք ուսումնասիրվում են։
Թարմացված տեղեկությունների համաձայն՝ Թուրքիայի անվտանգության ուժերը Ստամբուլում և Անկարայում համակարգված ոստիկանական գործողությունների շրջանակում, որոնք ընդգրկում էին մի քանի նահանգներ, ձերբակալել են ավելի քան 357 կասկածյալի։
Թարգմանությունը՝ Էմմա Չոբանյանի
