Զելենսկին հերքել է Պուտինի նստավայրի վրա հարձակման մասին տեղեկությունները

Ռուսաստանի արտաքին գործերի նախարար Սերգեյ Լավրովը հայտարարել է, որ Ուկրաինան փորձել է հարձակվել Ռուսաստանի նախագահ Վլադիմիր Պուտինի պետական նստավայրի վրա՝ Նովգորոդի մարզում, կիրառելով 91 անօդաչու թռչող սարք (ԱԹՍ)։ Այս մասին հայտնում է DW-ն։

Նովգորոդի մարզում` Վալդայ լճի ափին, գտնվում է Պուտինի նստավայրը։ Լավրովի խոսքով՝ հարձակումը տեղի է ունեցել դեկտեմբերի 29-ի գիշերը։ Բոլոր 91 անօդաչուները խոցվել են։ Տուժածների կամ վնասների մասին տեղեկություններ չեն ստացվել։ Նա հավելել է, որ այդ հարձակման պատճառով «ՌԴ-ի բանակցային դիրքորոշումը կվերանայվի», սակայն Մոսկվան «մտադիր չէ դուրս գալ ԱՄՆ-ի հետ բանակցային գործընթացից»։

Միաժամանակ ՌԴ պաշտպանության նախարարության տվյալներով՝ դեկտեմբերի 28-ին՝ ժամը 23:00-ից մինչև դեկտեմբերի 29-ի ժամը 7:00-ը, Նովգորոդի մարզի երկնքում խոցվել է ընդամենը 18 ուկրաինական ԱԹՍ, իսկ ժամը 7:00-9:00-ը՝ ևս 23։ Ընդհանուր առմամբ, դեկտեմբերի 29-ի գիշերը Ռուսաստանի տարածքում հակաօդային պաշտպանության միջոցներով որսացվել և ոչնչացվել է 89 ուկրաինական անօդաչու, հաղորդել է նախարարությունը։

Այլ աղբյուրներից հարձակման մասին տեղեկատվության հաստատում չկա։ Ուկրաինայի նախագահ Վլադիմիր Զելենսկին Լավրովի հայտարարությունը Պուտինի նստավայրի վրա հարձակման մասին անվանել է «սուտ» և դա կապել է այն բանի հետ, որ Ռուսաստանը պատրաստվում է հարված հասցնել Կիևի կառավարական թաղամասին։

«Ռուսները չեն ցանկանում ավարտել այս պատերազմը։ Իրենց հայտարարությամբ, թե իբր հարձակման է ենթարկվել ինչ-որ նստավայր, նրանք պարզապես հող են նախապատրաստում մայրաքաղաքի և պետական շենքերի վրա հարվածներ հասցնելու համար»,- ասել է Զելենսկին։

Ուկրաինայի նախագահի կարծիքով՝ նման հայտարարություններով Մոսկվան փորձում է խաթարել խաղաղ բանակցություններում Կիևի և Վաշինգտոնի միջև ձեռք բերված առաջընթացը։ Նա կոչ է արել ԱՄՆ նախագահ Դոնալդ Թրամփին «համապատասխան կերպով արձագանքել ռուսական սպառնալիքներին»։