Ղազախստանը ներկայացրել է ադրբեջանական օդանավի կործանման հնարավոր պատճառը

Ադրբեջանական օդանավին վնասը, ենթադրաբար, պատճառվել է մարտագլխիկի հարվածային տարրերի կողմից, սակայն դրանց ծագումը հնարավոր չէ որոշել։ Ադրբեջանական լրատվամիջոցների հաղորդմամբ՝ այս մասին ասվում է Ղազախստանի Տրանսպորտի նախարարության միջանկյալ զեկույցում՝ «Ադրբեջանական ավիաուղիներ» ընկերության Embraer 190 4K-AZ65 ինքնաթիռի ավիավթարի հետ կապված քննության ընթացքի վերաբերյալ։

Վթարի հետաքննության շրջանակում անցկացվել են հետևյալ ուսումնասիրությունները. հայտնաբերված օտար մետաղական առարկաների (արտաքին առարկաների) համապարփակ ուսումնասիրություն (հետքաբանություն, բալիստիկա, պայթուցիկ նյութեր և հրդեհային):

Նշվում է, որ ուսումնասիրության արդյունքում պայթուցիկ նյութերի հետքեր չեն հայտնաբերվել: Փորձաքննության ներկայացված երեք թթվածնային բալոնների վրա պայթյունի հետքեր չեն հայտնաբերվել: Ինքնաթիռի վնասը, ենթադրաբար, առաջացել է մարտագլխիկի բեկորներից, սակայն դրանց ծագումը հնարավոր չէ որոշել:

Հիդրավլիկ համակարգի թիվ 2 խողովակի հատվածի հետքային զննման արդյունքում պարզվել է խողովակի վնասումը: Վնասվածքը պայմանավորված է մետաղի պատռվածքով, որն առաջանում է պինդ առարկաների միջև շփումից։ Միջանցիկ վնասը կարող է առաջանալ երկաթի վրա հիմնված մետաղական համաձուլվածքից (հիմքը՝ պողպատ) պատրաստված մետաղական բեկորներից (արտաքին առարկաներից)։

Honeywell International Inc․-ի գործարանի մոդուլային ավիացիոն բլոկից հանված կենտրոնական սպասարկման համակարգչի (Central Maintenance Computer) ուսումնասիրություն։ Ջերմային ազդեցության պատճառով տվյալներ հանելը հնարավոր չի եղել։ Honeywell International Inc.-ը խորհուրդ է տվել կապվել հիշողության քարտեր արտադրող Delkin Devices Inc.-ի հետ՝ տվյալները վերականգնելու համար։ Հանձնաժողովն այժմ բանակցություններ է վարում ԱՄՆ լիազոր ներկայացուցչի հետ՝ Delkin Devices Inc.-ի բազայի հիման վրա ստուգում անցկացնելու համար: Այս ստուգումը կներառի CMC Electronics-ի թիվ 1 և թիվ 3 մոդուլային ավիացիոն բլոկից հանված գլոբալ դիրքորոշման համակարգի (GPS) կասետները (GPS1 և GPS2): Աշխատանքներն ավարտվել են, վերլուծությունն ընթացքի մեջ է:

Նշվում է, որ քննչական հանձնաժողովն այժմ սպասում է Կենտրոնական սպասարկման համակարգչի կասետի վերլուծության ավարտին և Հակամարտության գոտիների վրա կամ դրանց մոտակայքում թռիչքների ռիսկերի գնահատման վերլուծության աշխատանքային խմբի զեկույցի պատրաստմանը։

Քննչական հանձնաժողովը հավասարակշռված մոտեցում է ցուցաբերում, բոլոր եզրակացությունները կլինեն օբյեկտիվ և հիմնված կլինեն բացառապես փաստերի վրա: Նշվում է, որ ավիավթարի հետաքննության վերջնական զեկույցը կհրապարակվի Ղազախստանի տրանսպորտի նախարարության կայքում:

Թարգմանությունը՝ Էմմա Չոբանյանի