26.04.2026 | 21:21
Իրավիճակը Մալիում․ մահացել է պաշտպանության նախարարը, երկրում թեժ մարտեր են
Բաքվի դատարանում Արկադի Ղուկասյանն ու Բակո Սահակյանը եզրափակիչ ելույթով են հանդես եկել
Քաղաքականություն
26.12.2025 | 09:28
Արցախի ղեկավարների շինծու գործերով դատական հերթական նիստն է կայացել Բաքվի ռազմական դատարանում։ Նախագահող դատավոր Զելյնալ Աղաևը հայտարարել է, որ դատական նիստը կշարունակվի հայ գերիների եզրափակիչ խոսքով, գրում են ադրբեջանական լրատվամիջոցները։
Արցախի նախկին նախագահ Արկադի Ղուկասյանը նշել է, որ համաձայն չէ մեղադրանքի կողմի ապացույցների հետ և ներկայացրել է իր հակափաստարկները։ Նա հայտարարել է, որ մեղադրանքի կողմը «Խորհրդային Ղարաբաղ» թերթում իր աշխատանքը ներկայացրել է որպես հանցագործություն, սակայն ինքը համաձայն չէ դրա հետ։ Նա ասել է, որ ինքը թերթի չորս փոխխմբագիրներից մեկն է եղել և թերթը թարգմանել է ռուսերեն։ Ղուկասյանը նշել է, որ թերթի գործունեությունը հանցագործություն չի համարում։
Արկադի Ղուկասյանն ասել է, որ 2007 թվականին հեռացել է մեծ քաղաքականությունից և այլևս չի վերադարձել։ Նա նաև հայտարարել է, որ իրեն մեղավոր չի ճանաչում իրեն առաջադրված բոլոր մեղադրանքներում։
Արցախի նախկին նախագահ Բակո Սահակյանը նույնպես ներկայացրել է մեղադրանքի կողմի պնդումներին իր հակափաստարկները։ Նա նաև մեկնաբանել է իրենց որպես հանցավոր կազմակերպություն ներկայացնելը. «Ոչ մի հանցավոր կազմակերպություն գոյություն չի ունեցել և չէր կարող գոյություն ունենալ»։
Դատավարությունը կշարունակվի դեկտեմբերի 26-ին։
Թարգմանությունը՝ Էմմա Չոբանյանի
