08.06.2026 | 17:40
Եթե Ծառուկյանը լավ մտածի՝ պիտի մատաղ անի, որ ԱԺ չանցնի․ ՔՊ-ին օդ ու ջրի պես պետք են նրա մանդատները ․ Նորայր Նորիկյան․ ՏԵՍԱՆՅՈՒԹ
Թրամփը Ղազախստանի և Ուզբեկստանի ղեկավարներին հրավիրել է ԱՄՆ-ում կայանալիք G20-ի գագաթնաժողովին
Քաղաքականություն
24.12.2025 | 14:25
ԱՄՆ նախագահ Դոնալդ Թրամփը Ղազախստանի և Ուզբեկստանի առաջնորդներ Կասիմ-Ժոմարտ Տոկաևին և Շավքաթ Միրզիյոևին հրավիրել է Մայամիում կայանալիք G20 գագաթնաժողովին։ Նա այս մասին հայտնել է իր Truth Social սոցիալական ցանցում, գրում է Current time-ը։
Նա հայտնել է, որ Տոկաևի և Միրզիյոևի հետ հեռախոսազրույցի ընթացքում «քննարկել են շարունակվող հակամարտություններում խաղաղություն հաստատելու, ինչպես նաև երկրների միջև առևտրի և համագործակցության ընդլայնման կարևորությունը»։
Տոկաևի աշխատակազմը, իր հերթին, հայտնել է, որ Թրամփի հետ հեռախոսազրույցը «տևական» է եղել։ Ղազախստանի նախագահը, մասնավորապես, վերահաստատել է իր հանձնառությունը նոյեմբերին Վաշինգտոն կատարած այցի և Կենտրոնական Ասիա-ԱՄՆ գագաթնաժողովի ընթացքում ձեռք բերված պայմանավորվածությունների իրականացման հարցում և ընդգծել ուկրաինական հակամարտության լուծման բարդությունը, որտեղ տարածքային հարցը գերակա է և պահանջում է փոխզիջումներ երկու կողմերից էլ՝ հաշվի առնելով տեղում առկա իրական իրավիճակը։
Ուզբեկստանի նախագահի աշխատակազմի կայքում նշվում է, որ Միրզիյոևը և Թրամփը քննարկել են ամենաբարձր մակարդակով ձեռք բերված պայմանավորվածությունների ընթացքը և ուզբեկա-ամերիկյան ռազմավարական գործընկերության զարգացման հեռանկարները։ Գործող նախագծերը խթանելու և նորերը զարգացնելու համար ստեղծվել է ԱՄՆ-Ուզբեկստանի գործարարության և ներդրումների խորհուրդ, աշխատանքներ են տարվում համատեղ ներդրումային հիմնադրամ ստեղծելու ուղղությամբ, և Ուզբեկստանի երեք շրջանների պատվիրակություններ այցելել են Միացյալ Նահանգներ՝ ԱՄՆ նահանգների հետ համագործակցություն հաստատելու համար։
Միրզիյոևը նաև Թրամփին հրավիրել է Ուզբեկստան՝ ամերիկացի առաջնորդի համար հարմար ժամանակ։ Նմանատիպ հրավեր Թրամփը ստացել է Տոկաևից, որն ասել է, որ ԱՄՆ նախագահի այցը կարող է լինել «պատմական իրադարձություն»։
ԱՄՆ-ի ոչ մի գործող նախագահ երբեք չի այցելել Կենտրոնական Ասիա։
Թրամփի իշխանության գալուց ի վեր Միացյալ Նահանգները Կենտրոնական Ասիայի տարածաշրջանի հետ քաղաքական և տնտեսական համագործակցության խորացման կուրս է ընդունել, որը Վաշինգտոնը դիտարկում է որպես կարևորագույն հանքային պաշարների աղբյուր, ասվում է հրապարակման մեջ։
Ամերիկայի հետաքրքրությունը ռեսուրսներով հարուստ երկրների նկատմամբ ուժեղացել է այն բանից հետո, երբ Չինաստանը, որը գրեթե մենաշնորհ ունի հազվագյուտ մետաղների շուկայում, այդ տարրերի արտահանման սահմանափակումներ է սահմանել, որոնք օգտագործվում են բարձր տեխնոլոգիական արտադրանքի արտադրության մեջ։
Թարգմանությունը՝ Էմմա Չոբանյանի
