24.12.2025 | 13:54
Քննարկվել են Հայաստանից ԱՄՆ գյուղատնտեսական մթերքներ արտահանելուն առնչվող հարցեր
Թուրքիայում հետաքննություն է սկսվել Լիբիայի ԳՇ պետի ավիավթարի գործով. հայտնաբերվել են Անկարայի մոտ վթարված ինքնաթիռի բեկորները. ՏԵՍԱՆՅՈՒԹ
Քաղաքականություն
24.12.2025 | 11:09
Թուրքիայի իշխանությունները պաշտոնական հետաքննություն են սկսել Անկարայի մոտակայքում Լիբիայի ռազմական ինքնաթիռի վթարի գործով, որի հետևանքով զոհվել են հյուսիսաֆրիկյան երկրի գլխավոր գեներալը և չորս այլ բարձրաստիճան սպաներ։ Այս մասին հայտնել է արդարադատության նախարար Յըլմազ Թունջը, գրում է Turkiye today-ը։
Լիբիայի գլխավոր շտաբի պետ, գեներալ Մուհամմեդ Ալի ալ-Հադդադը և նրա պատվիրակության անդամները պաշտոնական այցից հետո մեկնում էին Թուրքիայից։
«Գլխավոր դատախազի մեկ տեղակալ համակարգում է չորս դատախազների աշխատանքը հետաքննության շրջանակում»,- հայտնել է Թունջը սոցցանցերում։
Falcon 50 բիզնես դասի ինքնաթիռը վթարի է ենթարկվել Հայմանա շրջանում՝ Անկարայից մոտ 75 կիլոմետր հարավ, Էսենբողա օդանավակայանից ժամը 20:10-ին թռիչքից կարճ ժամանակ անց տեխնիկական արտակարգ իրավիճակի մասին հայտնելուց հետո։ Օդային երթևեկության կարգավարները կորցրել են ինքնաթիռի հետ կապը ժամը 20:52-ին՝ արտակարգ վայրէջքի մասին ծանուցում ստանալուց ընդամենը մի քանի րոպե անց։
Թուրքիայի ժանդարմերիայի ուժերը հայտնաբերել են վթարի վայրը, հաստատել է ներքին գործերի նախարար Ալի Երլիքայան։
Թուրքիայում ժամանակավորապես փակվել է Անկարայի օդային տարածքը, արտակարգ իրավիճակների արձագանքման խմբերը մոբիլիզացվել են՝ անհետացած ինքնաթիռը գտնելու համար։ Կործանված ինքնաթիռի բեկորները հայտնաբերվել են սկզբնական աղետի ազդանշանից մի քանի ժամ անց։
Թուրքիայի նախագահի մամուլի ծառայության ղեկավար Բուրհանեթթին Դուրանը հայտարարել է, որ հայտնաբերվել են Լիբիայի գլխավոր շտաբի պետին, նրա չորս ուղեկցորդներին և անձնակազմի երեք անդամներին տեղափոխող մասնավոր ինքնաթիռի բեկորները։
Լիբիայի վարչապետ Աբդուլհամիդ Ալդաբայբան նույնականացրել է բոլոր հինգ զոհերին, իսկ միջադեպը Լիբիայի ռազմական կառույցի ազգային ողբերգություն որակել: Ալ-Հադդադից բացի՝ մահացածների թվում են Լիբիայի ցամաքային զորքերի շտաբի պետ, գեներալ-մայոր Ալ-Ֆեյտուրի Ղրաիբիլը, Ռազմական արտադրության գործակալության տնօրեն, բրիգադի գեներալ Մահմուդ Ալ-Քաթիվին, շտաբի պետի խորհրդական Մոհամեդ Ալ-Ասավի Դիաբը և մամուլի գրասենյակի լուսանկարիչ Մոհամեդ Օմար Ահմեդ Մահջուբը։
Լիբիայի կառավարությունը եռօրյա ազգային սուգ է հայտարարել։
Լիբիայի պատվիրակությունը օրն անցկացրել էր Թուրքիայի մայրաքաղաքում՝ պաշտոնական խորհրդակցությունների համար: Ալ-Հադդադը հանդիպել է պաշտպանության նախարար Յաշար Գյուլերի և Թուրքիայի ցամաքային զորքերի հրամանատար, գեներալ Մեթին Թոքելի հետ ինքնաթիռ նստելուց մի քանի ժամ առաջ: Այցը տեղի է ունեցել Թուրքիայի գլխավոր շտաբի պետ, գեներալ Սելջուկ Բայրաքթարօղլուի հրավերով։
Ֆրանսիական Dassault Aviation ավիատիեզերական ընկերության կողմից արտադրված երկշարժիչ Falcon 50-ը շահագործման է հանձնվել 1976 թվականին և մինչ օրս լայնորեն օգտագործվում է գործնական և կառավարական ուղևորությունների համար:
Թարգմանությունը՝ Էմմա Չոբանյանի
