31.10.2026 | 11:08
ԿԸՀ-ն սահմանել է նոյեմբերի 29-ի ՏԻՄ ընտրություններին մասնակցող ուժերի հերթական համարները
Փաշինյանը չհերքեց Շիրակի մարզպետի ազատման մասին տեղեկությունը․ Դավիթ Առուշանյանն այս պահին աշխատավայրում է
Քաղաքականություն
19.12.2025 | 13:30
Նիկոլ Փաշինյանը չի հերքում Շիրակի մարզպետ Դավիթ Առուշանյանի՝ պաշտոնից հեռանալու մասին տեղեկությունները։ Factor.am-ը երեկ կառավարության նիստից հետո վարչապետից հետաքրքրվեց՝ ճի՞շտ են հրապարակումները Շիրակի մարզպետի փոփոխության վերաբերյալ, որին Փաշինյանն արձագանքեց․ «Եթե կլինի համապատասխան որոշում, կհրապարակվի, կիմանաք»։
ՔՊ-ական Դավիթ Առուշանյանի ազատման մասին տեղեկությունները սկսեցին շրջանառվել դեկտեմբերի 17-ին՝ նրա պաշտոնավարման մեկ տարվա գործունեության ասուլիսից րոպեներ առաջ։ Նախատեսված ասուլիսը չեղարկվեց։
Ուշագրավ է, որ դեկտեմբերի 16-ին Առուշանյանի հարցը քննարկվել է ՔՊԿ վարչության նիստում։ Վարչությունը հաստատել է նրա թեկնածությունը 2026 թվականի ԱԺ ընտրական ցուցակում։ Այս տեղեկությունը Factor.am-ի հարցին ի պատասխան՝ հայտնեց տարածքային կառավարման և ենթակառուցվածքների նախարար Դավիթ Խուդաթյանը։
Դավիթ Առուշանյանը երեկ չէր մասնակցում Կառավարության նիստին։ Նախարար Խուդաթյանը բացակայությունն արտառոց չհամարեց, Factor.am-ի հարցին ի պատասխան՝ ասաց, որ, օրինակ, նաև Սյունիքի մարզպետը ներկա չէ։
Դավիթ Առուշանյանն անձամբ ուղիղ չի պատասխանում՝ իր ազատման հարցն օրակարգում կա՞, թե՞ ոչ։ Այսօր Factor.am-ի հարցերին ի պատասխան՝ միայն ասաց, որ մարզպետարանում է և խորհրդակցություն է անցկացնում։ Հստակեցնող հարցին՝ արդյո՞ք աշխատակազմին հրաժեշտ է տալիս, Առուշանյանը կրկին հստակ պատասխան չտվեց։
Նարեկ Կիրակոսյան
