ՄԱԿ-ի Գլխավոր վեհաժողովը թարմացրել է Ուկրաինայում ՌԴ-ի իրականացրած խախտումների վերաբերյալ բանաձևը. ինչպես է քվեարկել ՀՀ-ն

ՄԱԿ-ի Գլխավոր վեհաժողովն ընդունել է թարմացված բանաձև՝ Ռուսաստանի կողմից Ուկրաինայի օկուպացված տարածքներում, այդ թվում՝ Ղրիմում և Սևաստոպոլում մարդու իրավունքների վիճակի վերաբերյալ, գրում է DW-ի ռուսական ծառայությունը:

ՄԱԿ-ի 79 անդամ պետություն քվեարկել է բանաձևի օգտին, 16-ը՝ դեմ, իսկ 73-ը՝ ձեռնպահ: Բանաձևին դեմ են արտահայտվել Ռուսաստանը, Բելառուսը, Չինաստանը, Իրանը, Հյուսիսային Կորեան, Կուբան, Նիկարագուան և մի քանի աֆրիկյան երկրներ։

Հայաստանը ձեռնպահ է քվեարկել։

Բանաձևը հստակորեն դատապարտում է Ռուսաստանի ագրեսիվ պատերազմն Ուկրաինայի դեմ, վերահաստատում է Ուկրաինայի ինքնիշխանությունն ու տարածքային ամբողջականությունը միջազգայնորեն ճանաչված սահմանների շրջանակում և մերժում ուկրաինական տարածքների կարգավիճակը փոխելու ցանկացած փորձ: Գլխավոր վեհաժողովը պահանջել է, որ Ռուսաստանն անհապաղ դադարեցնի իր ագրեսիան և դուրս բերի բոլոր զորքերն ուկրաինական տարածքից:

Փաստաթուղթը վերաբերում է Ուկրաինայի՝ ՌԴ-ի կողմից բոլոր օկուպացված տարածքներում մարդու իրավունքների վիճակին և կոչ է անում ուժեղացնել Ռուսաստանի օկուպացիոն իշխանությունների կողմից համակարգային խախտումների միջազգային մոնիթորինգը։ Բանաձևում նշվում է, մասնավորապես, օկուպացված տարածքների ռազմականացման, դրանց բնակիչների հարկադիր զորակոչի, լրագրողների, մարդու իրավունքների պաշտպանների և քաղաքացիական հասարակության ներկայացուցիչների հետապնդումների, ինչպես նաև մշակութային ժառանգության ոչնչացման մասին, մասնավորապես, Ղրիմում:

Թարմացված բանաձևը նաև պարունակում է դրույթներ, որոնք բացահայտորեն դատապարտում են ուկրաինացի ռազմագերիների և անօրինական կերպով պահվող քաղաքացիական անձանց նկատմամբ կտտանքները, անմարդկային վերաբերմունքը և մարդու իրավունքների այլ կոպիտ խախտումները: Փաստաթուղթը հիմնված է ՄԱԿ-ի անկախ միջազգային հանձնաժողովի եզրակացությունների վրա, որոնք հաստատում են բռնի անհետացումների և կտտանքների դեպքերը ինչպես օկուպացված տարածքներում, այնպես էլ Ռուսաստանում: Ավելին՝ փաստաթուղթը դատապարտում է Ռուսաստանի հրաժարումն առևանգված և գերի վերցված ուկրաինացիների ճակատագրի վերաբերյալ տեղեկատվություն տրամադրելուց:

Ուկրաինայի արտաքին գործերի նախարար Անդրեյ Սիբիհան ողջունել է ՄԱԿ-ի Գլխավոր վեհաժողովի կողմից բանաձևի ընդունումը:

«Ուկրաինան ամեն տարի նախաձեռնում է այս բանաձևի ընդունումը 2016 թվականից ի վեր: Փաստաթուղթը խստորեն դատապարտում է Ռուսաստանի ագրեսիան, վերահաստատում է Ուկրաինայի ինքնիշխանությունն ու տարածքային ամբողջականությունը և պահանջում է անհապաղ դադարեցնել պատերազմը և դուրս բերել ռուսական զորքերը»,- գրել է Սիբիհան X սոցիալական ցանցում:

Նա նշել է, որ բանաձևն ամրապնդում է մարդու իրավունքների և մարդասիրական իրավունքի լուրջ խախտումների միջազգային մոնիթորինգը և ընդգծում հաշվետվողականության անհրաժեշտությունը։ Սիբիհան շնորհակալություն է հայտնել 79 պետություններին սկզբունքային աջակցության համար։