Ուկրաինական ԱԹՍ-ները գրոհել են Օրյոլի ջերմաէլեկտրակայանն ու «Տոլյատիազոտ» գործարանը. ՏԵՍԱՆՅՈՒԹ

ՌԴ Օրյոլի մարզի նահանգապետ Անդրեյ Կլիչկովը հայտնել է, որ ուկրաինական անօդաչու թռչող սարքի հարձակման հետևանքով Օրյոլ քաղաքում կոմունալ ծառայություններին մեծ վնաս է պատճառվել։ Նա հայտնել է, որ ջեռուցման և տաք ջրի մատակարարման ժամանակավոր սահմանափակումներ են մտցվել, իսկ քաղաքի Սովետսկի շրջանի կրթական հաստատություններում և նախադպրոցական հաստատություններում դասերը դադարեցվել են, գրում է Current time-ը։

Ուկրաինական «Exilenova+» տելեգրամ ալիքը, հղում անելով տեղի բնակիչներին, հայտնել է երկու հրթիռային հարվածի մասին։ Առաջին հրթիռը, ենթադրաբար, հարված է հասցվել ջերմաէլեկտրակայանին, հետո՝ տրանսֆորմատորային սարքավորումներին։ Քաղաքի մի մասում էլեկտրաէներգիան անջատվել է։

Տելեգրամ ալիքները հաղորդում են նաև Սամարայի մարզում գտնվող «Տոլյատիազոտ»-ի վրա հարձակման մասին (ընկերությունն աշխարհի տասը խոշորագույն ամոնիակ արտադրողներից է):

Կրկին անօդաչուների հարձակման է ենթարկվել նաև Ռոստովի մարզը։ Նահանգապետ Յուրի Սլյուսարը հայտարարել է, որ Դոնի Ռոստովում Բոլգարստրոյի բնակելի շենքերը և Արևմտյան արդյունաբերական գոտու արդյունաբերական սպառողները զրկվել են էլեկտրաէներգիայից՝ էլեկտրահաղորդման գծի անսարքության պատճառով: Տագանրոգում վնասվել են հինգ մասնավոր տների պատուհաններ և տանիքներ, երեք մեքենա այրվել է։ Խափանվել է նաև Մյասնիկովսկի շրջանի Նեդվիգովկա գյուղի և Ազովսկի շրջանի Զաիմո-Օբրիվ գյուղի էլեկտրամատակարարումը:

Ռուսաստանի Պաշտպանության նախարարությունը հայտնել է, որ գիշերը խոցվել է ուկրաինական 94 անօդաչու թռչող սարք, որոնցից 36-ը՝ Ռոստովի մարզի երկնքում։

Թարգմանությունը՝ Էմմա Չոբանյանի