14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
7-րդ գումարման Ազգային ժողովի նիստը տեղի է ունենալու հունվարի 7-ին, ոչ թե՝ դեկտեմբերի 31-ին
Քաղաքականություն
02.11.2018 | 23:04
7-րդ գումարման Ազգային ժողովի առաջին նիստը տեղի է ունենալու հունվարի 7-ին, ոչ, թե դեկտեմբերի 31-ին, ինչպես հայտարարել էր վարչապետի խորհրդական Մեսրոպ Առաքելյանը:
Նոյեմբերի 2-ին Կենտրոնական ընտրական հանձնաժողովը պաշտոնապես հայտարարեց, որ Ազգային ժողովի արտահերթ ընտրությունները տեղի են ունենալու դեկտեմբերի 9-ին: Նախընտրական քարոզչության ժամանակահատվածը կսկսվի նոյեմբերի 26-ից և կտևի մինչև դեկտեմբերի 7-ը։
ԱԺ կանոնակարգ սահմանադրական օրենքի 32-րդ հոդվածի համաձայն, Ազգային ժողովի արտահերթ ընտրության դեպքերում առաջին նստաշրջանը հրավիրվում է նորընտիր Ազգային ժողովի կազմավորումից հետո` երկրորդ երկուշաբթի օրը՝ ժամը 10:00-ին։ Ընտրությունները կայանալու է դեկտեմբերի 9-ին։ Ընտրական օրենսգրքի 75-րդ հոդվածի համաձայն Կենտրոնական ընտրական հանձնաժողովը քվեարկության օրվանից հետո` 7-րդ օրը՝ այսինքն դեկտեմբերի 16-ին հիմք ընդունելով ընտրական տեղամասերում քվեարկության արդյունքների վերաբերյալ արձանագրությունները, վերահաշվարկի արդյունքները, քվեարկության արդյունքների վերաբերյալ ընդունած որոշումները, կազմում է արձանագրություն քվեարկության վերջնական արդյունքների վերաբերյալ:
Դեկտեմբերի 16-ին հրապարակվելու են ընտրությունների նախնական արդյունքները: Սակայն, Ընտրական օրենսգրքի 102-րդ հոդվածի համաձայն՝ Ազգային ժողովի ընտրությունների արդյունքով սույն օրենսգրքի 95-րդ հոդվածի 1-ին մասով, 97-րդ հոդվածի 4-րդ մասով, 99-րդ հոդվածով ընդունված որոշումների վիճարկման մասին դիմումներ սահմանադրական դատարան կարող են ներկայացվել համապատասխան որոշման հրապարակման օրվանից հետո` 5-րդ օրը՝ մինչև ժամը 18.00-ն:
Ստացվում է, որ դեկտեմբերի 16-ին ևս գումարվում է հինգ օր և սա լինում է արդեն դեկտեմբերի 21-ը: Եթե ՍԴ բողոք չի ներկայացվում, ապա ԿԸՀ-ն կարող է դեկտեմբերի 22-ին ամփոփել քվեարկության վերջնական արդյունքները: Այս տարի դեկտեմբերի 22-ը համընկնում է շաբաթ օրվա հետ և քանի որ օրենքի պարտադրանք չկա, որպեսզի ոչ աշխատանքային օրով ԿԸՀ-ն նիստ հրավիրի, ապա ԿԸՀ նիստը տեղի է ունենալու երկուշաբթի՝ դեկտեմբերի 24-ին:
Դեկտեմբերի 24-ին հաջորդող հաջորդող 2-րդ երկուշաբթին լինում է հունվարի 7-ը: Ստացվում է, որ 7-րդ գումարման Ազգային ժողովի անդրանիկ նիստը տեղի է ունենալու հունվարի 7-ին, եթե իհարկե վերոնշյալ 5 օրվա ընթացքում որևէ քաղաքական ուժ չի դիմում Սահմանադրական դատարան: Եթե դիմողներ եղան, ապա առաջին նիստը տեղի կունենա հունվարի 7-ից 15 օր անց, քանի որ բողոքը ՍԴ-ն քննելու է 15 օրվա ընթացքում:
Հայկ Վարդանյան
