Բաքվում ադրբեջանցի պաշտոնյաների կողմից սադրիչ հռետորաբանության հարցն է բարձրացվել․ Մինասյան․ ՏԵՍԱՆՅՈՒԹ

«Մենք գտնվում ենք երկխոսության գործընթացի մեկնարկային փուլում, ինչը բավական բարդ է, նաև հաշվի առնելով 35 տարվա հակամարտությունը, դրա ողջ զգայական շերտերը, և բնականաբար, մենք էլ քաջ գիտակցում ենք, որ այս գործընթացը բարդ է, և առկա քննադատությունը, իհարկե, կառուցողական քննադատությունը լիովին ընդունելի է մեզ համար, սակայն, եթե դա, այսպես, էմոցիոնալ դաշտում չի տեղավորվում միայն»,-այս մասին հրավիրված մամուլի ասուլիսի ժամանակ խոսեց ԱՔՀԿ ասոցացված փորձագետ Նարեկ Մինասյանը՝ անդրադառնալով Բաքու այցին։

Նշենք՝ «Խաղաղության կամուրջ» նախաձեռնության շրջանակներում Հայաստանից քաղաքացիական հասարակության ներկայացուցիչների խումբը մեկնել էր Բաքու` տեղում քաղհասարակության և իշխանության ներկայացուցիչների հետ հանդիպումներ ունենալու նպատակով։

«Միևնույն ժամանակ ցանկանում եմ ընդգծել, որ Ադրբեջանում քննարկումների արդյունքում, թե´ ադրբեջանցի գործընկերների հետ, թե´ Ադրբեջանի նախագահի օգնականի հետ հանդիպմանը, ադրբեջանական կողմից ընդգծվել է խաղաղության դիվիդենտների գաղափարը, այսինքն, որ պետք է ձեռնարկել պրակտիկ քայլեր, որպեսզի ժողովուրդը, երկու երկրների հասարակությունները իրենց մաշկի վրա զգան այդ խաղաղության կամ հաստատված խաղաղության, ինչպես հայտարարվում է, դրա օգուտները, դրա արդյունքները, և բնականաբար, բանակցություններ, քննարկումներ են ընթանում նաև այս ուղղությամբ, տարբեր պրակտիկ ծրագրերի վերաբերյալ։

Միևնույն ժամանակ, հայկական կողմը, հատկապես պարոն Հաջիևի հետ հանդիպմանը, բարձրացրել է տարբեր գրգռիչ գործոնների չեզոքացման խնդիրը, այսինքն, դրանցից է, օրինակ, ադրբեջանական տարբեր մակարդակի պաշտոնյաների կողմից, երբեմն սադրիչ, երբեմն խնդրահարույց հռետորաբանության բառակազմի կիրառումը՝ հայ-ադրբեջանական կարգավորման գործընթացի վերաբերյալ խոսելիս»,-նշեց Մինյասյանը։

Մանրամասները՝ տեսանյութում։