10.09.2026 | 17:01
1.45 մլրդ դրամ՝ Գյումրու թիվ 2 պոլիկլինիկայի հիմնանորոգման համար
Euronews-ը գրասենյակ է բացել Բաքվում․ հեռուստաալիքի ներկայիս սեփականատերն ու անկախության հետ կապված կասկածները
Քաղաքականություն
19.11.2025 | 23:30
Բաքվում նոյեմբերի 17-ից աշխատանքն է սկսել Euronews հեռուստաալիքի տեղական գրասենյակը։ Բացմանը ներկա են եղել լրատվամիջոցների ներկայացուցիչներ, դիվանագետներ և այլ հյուրեր։ Euronews-ի տնօրենների խորհրդի նախագահ Պեդրո Վարգաս Դավիդը նշել է, որ իր ղեկավարած մեդիա հոլդինգը միշտ պահպանել է հավասարակշռված դիրքորոշում Ադրբեջանի նկատմամբ և ճնշման է ենթարկվել հենց այդ դիրքորոշման համար։ Նա գոհունակություն է հայտնել հեղինակավոր եվրոպական մեդիա կազմակերպության Բաքվի գրասենյակի բացման կապակցությամբ։
Ադրբեջանական անկախ Meydan TV-ն ուշադրություն է հրավիրում այն հանգամանքի վրա, որ վերջին երկու տարիների ընթացքում Ադրբեջանում ձերբակալվել է շուրջ 30 լրագրող։ 2025 թվականի մարտ և ապրիլ ամիսներին իշխանությունները փակել են միջազգային լրատվամիջոցների տեղական գրասենյակները, ինչպիսիք են BBC-ն, Reuters-ը, «Ամերիկայի ձայնը» և Bloomberg-ը, կամ որոշել են հավատարմագրում տրամադրել միայն մեկ աշխատակցի։ Տեղական անկախ լրատվամիջոցները՝ Abzas Media-ն, Toplum TV-ն և Meydan TV-ն, նույնպես չեն կարողացել շարունակել իրենց գործունեությունը երկրում։ Այս լրատվամիջոցների աշխատակիցները ներկայում ձերբակալված են։
Լրատվամիջոցը հարցադրում է անում՝ այս պայմաններում Euronews-ն ինչպե՞ս է կարողացել գրասենյակ բացել Ադրբեջանում։
Euronews-ը հիմնադրվել է 1993 թվականի հունվարի 1-ին։ Հիմնադրումից ի վեր ալիքը գործել է որպես անկախ լրատվամիջոց։ Սակայն 2024 թվականին տեղի է ունեցել ղեկավարության փոփոխություն, և նոր տնօրեն է դարձել Կլաուս Շտրունցը, որը հայտնի է գերմանական Bild-ում իր աջակողմյան անցյալով։
Շտրունցը հանդես է գալիս միգրանտների դեմ, իսրայելամետ է, նույնիսկ մեղադրվում է Հունգարիայի աջակողմյան առաջնորդ Վիկտոր Օրբանի հետ գործարար կապերի մեջ։
Politico-ի տվյալներով՝ Օրբանը զգալի ազդեցություն ունի ալիքի վրա։ Ավելին՝ հետաքննական լրագրողական նյութերը բացահայտել են ալիքի հիմնական սեփականատիրոջ՝ Alpac Capital-ի՝ Օրբանի ու նրա շրջապատի միջև կապերը։
Քննադատները նշում են, որ ընթացիկ փոփոխությունները կասկածի տակ են դնում հեռուստաալիքի անկախությունը: Վերջին տարիներին Euronews-ը ռեպորտաժներ է պատրաստում, որոնք գովաբանում են Ադրբեջանի բնական գեղեցկությունը, նավթային եկամուտները և տնտեսական վիճակը։
Պեդրո Վարգասի հասցեին ուղղված քննադատությունն Ադրբեջանի նկատմամբ նրա դիրքորոշման համար, որը նաև հնչել է բացման արարողության ժամանակ, կապված է նաև այս հանգամանքների հետ: Ֆրանսիական Le Monde պարբերականը գրել է, որ 2022 թվականին Վարգասը հեռուստաալիքը վաճառել է կասկածելի գործարքներով Օրբանի հետ կապված մի ընկերության։
Վիկտոր Օրբանը Եվրոպայում հայտնի է իր աջակողմյան և հակաժողովրդավարական հայտարարություններով: Նա Ադրբեջանի նախագահ Իլհամ Ալիևի մտերիմ ընկերն է և համարվում է ադրբեջանական կառավարության կողմնակից եվրոպական կառույցներում որոշումների կայացմանն աջակցության գործում։
Ըստ Politico-ի՝ Euronews-ը, որը «կտրուկ փոփոխությունների» է ենթարկվել, նաև վտանգում է կորցնել իր անկախությունը Ադրբեջանում։
Քանի որ Ադրբեջանը «Լրագրողներ առանց սահմանների» (RSF) կազմակերպության մամուլի ազատության ինդեքսի ամենացածր հորիզոնականում է և ճնշում է գործադրում անկախ լրատվամիջոցների վրա, Euronews-ի գործունեության պայմանները երկրում և անկախության պահպանման հարցը հարցականի տակ են դրվում։
Թարգմանությունը՝ Էմմա Չոբանյանի
