13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
«30 հազար դրամի համար էստեղ չեմ մեռնի»․ քաղցկեղով հիվանդ դատապարտյալը 3 ամիս է՝ բուժում չի ստանում․ ՏԵՍԱՆՅՈՒԹ
Հասարակություն
19.11.2025 | 19:45
40-ամյա Ռուզաննա Տուդոյանը քրեակատարողական հիմնարկում Factor TV-ի նկարահանող խմբին է մոտենում դանդաղ քայլերով, զրույցի ընթացքում երբեմն կանգ է առնում՝ մի պահ շունչը տեղը բերելու համար։ Անազատության մեջ է 2 տարուց ավելի։ Ամիսներ առաջ պարանոցին փոքրիկ գոյացություն է նկատել։ Գոյացության տեսակը պարզելու համար բիոպսիա են իրականացրել։ Օգոստոսին հետազոտության արդյունքները ստացել է։
Ռուզաննայի խոսքով՝ կես տարուց ավելի է՝ սաստիկ ցավերի մեջ է, ստիպված է մշտապես ցավազրկողներ ընդունել։ Բայց միայն ցավազրկողները լուծում չեն․ արդեն 3 ամիս է՝ սպասում է քիմիաթերապիայի բուժման կուրսին։ Գործընթացի ձգձգման հետևանքով ստիպված է եղել 1 սրվակ ձեռք բերել իր միջոցներով։
Իսկ ինչո՞ւ պետության հոգածության տակ գտնվող դատապարտյալը ժամանակին բուժօգնություն չի ստանում․ հարցը բարձրաձայնել է ՔԿՀ-ներում դիտորդական առաքելություն իրականացնող խումբը և խնդրի մասին գրություններ հասցեագրել առողջապահության նախարար Անահիտ Ավանեսյանին։
Օրեր առաջ Factor TV-ն ևս գրավոր հարցում է ուղարկել նախարարություն՝ խնդրելով հայտնել, թե ինչո՞ւ է ձգձգվում Տուդոյանի պատշաճ բուժօգնություն ստանալու գործընթացը և արդյո՞ք այն ամբողջությամբ չպետք է պետությունը ֆինանսավորի։ 5 օր առաջ նախարարություն ուղարկված հարցումը միայն երեկ առավոտյան է մուտք արվել համակարգ։
Ամեն օր քիմիաթերապիային սպասող Ռուզաննան հուսալքված է, ապագան էլ մռայլ գույներով է տեսնում։
Ռուզաննան մասնագիտությամբ բուժքույր է, տևական ժամանակ աշխատել է «Երկրապահ» կամավորականների միությունում, ապա ՊՆ զորամասերից մեկում, ժպտում է այդ օրերի մասին հիշելիս: Հետո, հանգամանքների բերումով, հայտնվել է ճաղերից հետևում։
Նրան մեղադրանք է առաջադրվել ավազակությունը, որը կատարվել է բնակարան ապօրինի մուտք գործելու հոդվածի հատկանիշներով։ Գործով նախաքննությունն ու դատաքննությունն ընդամենը մի քանի ամսվա ընթացքում ավարտվել են, ազատազրկման է դատապարտվել 8 տարի ժամկետով։ Կինն ընդունում է՝ ծեծ եղել է, բայց ոչ ավելին։ Ասում է՝ եթե գումար ունենար և լավ փաստաբան կարողանար վարձել, այդ ծանր մեղադրանքն իր վրա չէին դնի։
Ռուզաննայի հետ այսօր կապի մեջ է միայն աղջիկը, խոսում են ամիսը 1 անգամ տեսազանգով։ Ընկերների ու մյուս հարազատների հետ շփում գրեթե չունի, միակ ցանկությունն այսօր ազատության մեջ լինելն ու առողջանալն է։
Մանրամասները՝ տեսանյութում։
Ռոզա Վարդանյան
