20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Սերժ Սարգսյանի նկատմամբ բացակայելու արգելք չկիրառելուց հետո խուզարկել են դատավոր Գիվի Հովհաննիսյանի նախկին աշխատակցի բնակարանը
Հասարակություն
12.11.2025 | 16:51
Հայաստանի երրորդ նախագահ Սերժ Սարգսյանի նկատմամբ բացակայելու արգելքը որպես խափանման միջոց ընտրելու միջնորդությունը մերժելուց հետո դատավոր Գիվի Հովհաննիսյանի աշխատակազմի նախկին աշխատակիցներից մեկի բնակարանում խուզարկություն է իրականացվել։ Այս մասին հայտնում են իրավապահ համակարգում Factor TV-ի աղբյուրները։ Քրեական վարույթը, որի շրջանակներում խուզարկությունը կատարվել է, հարուցված է Քրեական օրենսգրքի 444-րդ հոդվածով, այսինքն՝ հայտարարագիր ներկայացնելու պարտականություն ունեցող անձի կողմից հայտարարագրում կեղծ տվյալ ներկայացնելը կամ հայտարարագրման ենթակա տվյալը թաքցնելը։ Գործը, սակայն, չի առնչվում դատավորի գույքային դրությանը։
Հետաքրքիր է այն հանգամանքը, որ վարույթը նախաձեռնվել է դեռևս 2025-ի գարնան սկզբին, սակայն 8 ամիս անց միայն՝ այն բանից հետո, երբ Հովհաննիսյանը մերժել է Սերժ Սարգսյանի նկատմամբ բացակայելու արգելքը որպես խափաման միջոց կիրառելու վերաբերյալ Դատախազության միջնորդությունը, իրավապահները որոշել են խուզարկություն իրականացնել։
Մեզ հայտնի դարձավ նաև, որ դատավորը գործով չունի մեղադրյալի դատավարական կարգավիճակ, ավելին, գործում նրա անունը գրված չէ, այլ նշված է «դատական իշխանության ներկայացուցիչ»։ Իսկ նման ձևակերպման պատճառն այն է, որ դատավորի անունը գործում նշելը կարող է խնդրահարույց լինել՝ առանց նրա անձեռնմխելիությունը հաղթահարելու։
Հիշեցնենք, որ Սերժ Սարգսյանի վերաբերյալ Հակակոռուպցիոն դատարանում քննվող 2 գործերով դատավորները՝ Գիվի Հովհաննիսյանը և Արամ Գրիգորյանը, վերացրել են նրա նկատմամբ ընտրված բացակայելու արգելք խափանման միջոցը, սակայն Դատախազությունը նոյեմբերի 4-ին երկու գործերով դատավորներին միջնորդություններ է ներկայացրել՝ Սարգսյանի նկատմամբ կրկին բացակայելու արգելք կիրառելու մասին՝ պատճառաբանելով, թե օպերատիվ տվյալներ ունեն, որ Սարգսյանը պատրաստվում է գնալ Հայաստանից և չվերադառնալ։
Նոյեմբերի 4-ին և 5-ին Հակակոռուպցիոն դատարանում քննվել են միջնորդությունները, և մերժվել։ Դատավորներից առաջինը որոշումը կայացրել է Գիվի Հովհաննիսյանը, որին հաջորդել է դատավոր Արամ Գրիգորյանի որոշումը։
Դատարանում արդյունքի չհասնելուց հետո Սերժ Սարգսյանին հրավիրել են Հակակոռուպցիոն կոմիտե, նոր մեղադրանք ներկայացրել և նրա նկատմամբ բացակայելու արգելքն ընտրել որպես խափանման միջոց։
Արաքս Մամուլյան
