Ֆիդանը Սպիտակ տանը միացել է Թրամփ-Շաարա բանակցություններին․ նա ներկայացրել է Սիրիայի վերաբերյալ Անկարայի դիրքորոշումը

Թուրքիայի  արտգործնախարար Հաքան Ֆիդանը երկուշաբթի Վաշինգտոնում բարձր մակարդակի բանակցություններ է վարել, այդ թվում՝ հանդիպում է ունեցել Սիրիայի նախագահ Ահմեդ ալ-Շարաայի և ԱՄՆ բարձրաստիճան պաշտոնյաների հետ, որտեղ ներկայացրել է Անկարայի դիրքորոշումը Սիրիայի, Գազայի հատվածի և մի շարք այլ կարևոր տարածաշրջանային հարցերի վերաբերյալ, գրում է Turkiye today-ը։

«Ինչպես կարելի է ավելի արդյունավետ կառավարել խնդրահարույց տարածքները, մասնավորապես, Սիրիայի հարավային և հյուսիսային հատվածներում և այլ շրջաններում։ Ինչպես կարելի է մշակել Caesar Act-ը։ Մենք հնարավորություն ունեցանք մանրամասն ուսումնասիրել այս հարցերը և ներկայացնել մեր տեսակետներն ու դիրքորոշումները»,- ասել է նա ԱՄՆ մայրաքաղաքում գտնվող թուրքական լրատվամիջոցներին։

Ֆիդանի այցը համընկել է Սիրիայի նախագահ Ահմեդ ալ-Շարաայի՝ Սպիտակ տանը գտնվելու հետ։ Ֆիդանը նշել է, որ ինքը նույնպես հրավիրվել է Սպիտակ տուն, որտեղ միացել է ԱՄՆ պետքարտուղար Մարկո Ռուբիոյին, փոխնախագահ Ջեյ Դի Վենսին, Մերձավոր Արևելքի դեսպան Սթիվ Ուիթկոֆին, Թուրքիայում ԱՄՆ դեսպան և Սիրիայի հարցերով հատուկ դեսպան Թոմ Բարաքին, ինչպես նաև Սիրիայի արտաքին գործերի նախարար Ասաադ ալ-Շաիբանիին։

«Մենք հնարավորություն ունեցանք քննարկելու Թուրքիայի ընդհանուր տեսակետները Սիրիայի վերաբերյալ, ԱՄՆ-ի հետ համագործակցության հնարավորությունները և Սիրիայի զարգացմանը, միասնությանը, համերաշխությանը, խաղաղությանը և տարածաշրջանային անվտանգությանը վերաբերող բազմաթիվ հարցեր»,- ասել է Ֆիդանը։

Բացի այդ, Թուրքիայի ԱԳ նախարարին ԱՄՆ-ում ընդունել է նաև Սիրիայի նախագահ ալ-Շարաան։ Փակ դռների հետևում տեղի ունեցած հանդիպման մասին ոչինչ չի հաղորդվում։

ԱՄՆ-ում հանդիպումների ընթացքում Հաքան Ֆիդանը քննարկել է նաև Ռուսաստան-Ուկրաինա պատերազմը, Թուրքիայի հնարավոր դերը միջնորդական ջանքերում։ Անկարան և Վաշինգտոնը նաև կարծիքներ են փոխանակել Իրանի հետ միջուկային բանակցությունների վերաբերյալ։

Թարգմանությունը՝ Էմմա Չոբանյանի