11.09.2026 | 19:54
94 տարեկանում մահացել է Նորվեգիայի արքայադուստրը` եղբոր` Հարալդ թագավորի հուղարկավորությունից 2 օր անց
ՌԴ ԱԴԾ-ն հայտարարել է, թե ուկրաինական հետախուզությունը փորձել է հավաքագրել ռուս օդաչուների և ՄիԳ-31 կործանիչ առևանգել
Քաղաքականություն
11.11.2025 | 12:42
ՌԴ ԱԴԾ-ն հայտարարել է, որ խափանել է Ուկրաինայի պաշտպանության նախարարության գլխավոր հետախուզական վարչության և նրա «բրիտանացի համակարգողների» կողմից ռուս օդաչուների հավաքագրման և ՄիԳ-31 գերձայնային կործանիչ առևանգելու գործողությունը, գրում է Meduza-ն։
ԱԴԾ-ի վարկածով՝ ուկրաինացի հետախուզության աշխատակիցները ռուս օդաչուներին խոստացել են երեք միլիոն դոլար։
Կործանիչն առևանգելուց հետո, ըստ ԱԴԾ-ի վարկածի, ուկրաինական հետախուզությունը ծրագրել է «Կինժալ» հրթիռով զինված ՄիԳ-31 ինքնաթիռն ուղարկել Հարավարևելյան Եվրոպայում ՆԱՏՕ-ի ամենամեծ ավիաբազայի տարածք, որը գտնվում է Ռումինիայի Կոնստանցա քաղաքում, «որտեղ այն կարող էր խոցվել ՀՕՊ համակարգերի կողմից»։
«Ձեռնարկված միջոցառումները խափանել են ուկրաինական և բրիտանական հետախուզության՝ լայնածավալ սադրանք կազմակերպելու ծրագրերը»,- ասվում է հայտարարության մեջ։
ՏԱՍՍ-ը, հղում անելով ԱԴԾ հայտարարությանը, հաղորդում է, որ կործանիչն առևանգելու գործողությանը, ենթադրաբար, մասնակցել է Bellingcat հետաքննական խումբը:
«Ինքնաթիռի հրամանատարի հետ կապ հաստատելիս հետախուզությունն օգտագործել է, այսպես կոչված, Bellingcat կազմակերպությունը, որը վերահսկվում է Մեծ Բրիտանիայի CIS-ի կողմից և արդեն հայտնվել էր մեր տեսադաշտում»,- ասել է ԱԴԾ աշխատակիցը։
Ուկրաինական հետախուզությունը դեռևս չի մեկնաբանել ԱԴԾ-ի հայտարարությունը։
2023 թվականի օգոստոսին Ռուսաստանի բանակի ավիացիայի 319-րդ առանձին ուղղաթիռային գնդի օդաչու Մաքսիմ Կուզմինովը ռուսական Մի-8 ուղղաթիռ էր տեղափոխել Ուկրաինա: Ուկրաինական հետախուզության տեսանյութում օդաչուն պնդում է, որ ինքը կապ է հաստատել ուկրաինական իշխանությունների հետ, նաև խնդրել անձնակազմի մյուս անդամներին հանձնվել։ Նրանք, ի վերջո, սպանվել են ուկրաինացի զինվորների կողմից։ Ուղղաթիռն առևանգելու համար Կուզմինովը ստացել էր 500,000 դոլար և ուկրաինական անձնագիր՝ Իգոր Շևչենկո անուն-ազգանունով։ Ուկրաինական իշխանությունները առաջարկել էին Կուզմինովին չլքել Ուկրաինան, սակայն նա տեղափոխվել է Իսպանիա, որտեղ բնակարան է գնել Վիլյախոյոսա մունիցիպալիտետում։ 2024 թվականի փետրվարին Կուզմինովը սպանվել է Կալա Ալտա բնակելի համալիրում։
Թարգմանությունը՝ Էմմա Չոբանյանի
