12.01.2026 | 12:30
«Բրավո՛, Հայաստան»․ Քոնոր Մաքգրեգորը պատմել է իր երազանքի մասին
24 տարի առաջ սպանված Պողոս Պողոսյանի դին կարտաշիրիմվի՝ նոր փորձաքննություն իրականացնելու նպատակով․ ՏԵՍԱՆՅՈՒԹ
Հասարակություն
10.11.2025 | 14:24
«Առագաստ» սրճարանում 24 տարի առաջ սպանված Պողոս Պողոսյանի դին կարտաշիրմվի՝ փորձաքննություն իրականացնելու նպատակով։ Այսօր նման որոշում կայացրեց Երևանի քրեական դատարանի դատավոր Կարեն ֆարխոյանը։
Պողոս Պողոսյանի գերեզմանը գտնվում է Վրաստանի Հանրապետությունում։ Փորձաքննությանն ընդգրկված փորձագետները դատարանի որոշմամբ կմասնակցեն արտաշիրիմման գործողությանը; Դատարան որոշեց նաև, որ գործով դատախազը, պաշտպանության կողմը և տուժողի իրավահաջորդն ու ներկայացուցիչը կարող են ներկա լինել գործողությանը։
Հիշեցնենք, որ Պողոս Պողոսյանը սպանվել է 2001 թվականի սեպտեմբերի 24-ի լույս 25-ի գիշերը։ Այդ օրը Հայաստանի երկրորդ նախագահ Ռոբերտ Քոչարյանն այցելել է սրճարան և, ըստ գործում առկա տվյալների, Պողոս Պողոսյանը, նրան տեսնելով, ասել է՝ «պրիվետ Ռոբ», ինչն էլ դարձել է Քոչարյանի թիկնապահների հետ վիճաբանության պատճառ։ Դեպքի առթիվ 2001 թվականին քրեական գործ է հարուցվել ՀՀ նախկին Քրեական օրենսգրքի 103-րդ հոդվածով, այսինքն՝ հանցավոր անփութությամբ անզգույշ սպանություն կատարելը, Աղամալ Հարությունյանը մեղավոր է ճանաչվել ու դատապարտվել։
Դեպքի վերաբերյալ, սակայն, Հայաստանում տեղի ունեցած իշխանափոխությունից հետո Դատախազությանն ուղարկված դիմումով նոր հանգամանքներ են ներկայացրել Սթիվեն Նյուտոնի ներկայացուցիչները:
Ըստ Դատախազության՝ Նյուտոնի հայտարարությունն առերույթ վկայում է Պողոս Պողոսյանին կյանքից ոչ թե անզգուշությամբ զրկվելու, այլ մի խումբ անձանց կողմից խուլիգանական դրդումներով դիտավորությամբ սպանության մասին:
Այսպիսով, Պողոս Պողոսյանի մահվան փաստի առթիվ հարուցված քրեական գործով կայացված դատական ակտը նոր երևան եկած հանգամանքների հետևանքով վերանայելու համար Երևան քաղաքի դատախազությունում հարուցվել է համապատասխան վարույթ, ապա գլխավոր դատախազի տեղակալը բողոք է ներկայացրել ՀՀ վերաքննիչ դատարան՝ նոր երևան եկած հանգամանքների հիմքով գործը վերանայելու և 2002թ. փետրվարի 21-ի դատավճիռն ամբողջությամբ բեկանելու պահանջով։
Բողոքը բավարարվել է, գործն ուղարկվել է Առաջին ատյանի դատարան՝ նոր քննության։
Արաքս Մամուլյան
