Հասարակություն
03.11.2025 | 19:09
Երևանի քրեական դատարանում այսօր շարունակվեց մեղադրող Ծովակ Մնացականյանի միջնորդության քննությունը 24 տարի առաջ «Առագաստ» սրճարանում սպանված Պողոս Պողոսյանի դիակի կրկնակի դատաբժշկական փորձաքննություն իրականացնելու համար արտաշիրիմում կատարելու վերաբերյալ:
Նշենք, որ խոսքը «պրիվետ Ռոբ» արտահայտության համար Պողոս Պողոսյանի սպանության գործի մասին է: Այս գործով անզգույշ սպանության մեղադրանք է առաջադրվել այն ժամանակ նախագահ եղած Ռոբերտ Քոչարյանի անվտանգության աշխատակից Աղամալ Հարությունյանին, սակայն 2018-ին Հայաստանում տեղի ունեցած իշխանափոխությունից հետո գործով վկա Սթիվեն Նյուտոնը դիմել է Դատախազություն ու հայտնել, որ Պողոս Պողոսյանի նկատմամբ բռնություն են գործադրել մի խումբ անձինք և ոչ թե մեկ անձ:
Գործր վերաբացվել է, և մի քանի տարի քննությունից հետո միջնորդություն է ներկայացվել գործով կրկնակի դատաբժշկական փորձաքննություն նշանակելու վերաբերյալ, որի համար անհրաժեշտ է արտաշիրիմում իրականացնել:
Պողոսյանը հուղարկավորված է Վրաստանի Հանրապետությունում:
Աղամալ Հարությունյանի պաշտպան Ռոբերտ Բեջանյանը դեմ է արտաշիրիմում կատարելուն: Դատարանում դիրքորոշում է հայտնել, որ արտաշիրիմումը քննչական գործողություն է, որը չի կարող կատարվել դատարանի կողմից:
Բացի այդ՝ ըստ Հարությունյանի պաշտպանի՝ Հայաստանի կողմից ներգրավված փորձագետները չեն կարող փորձաքննություն իրականացնել, նրանք միայն արտաշիրիմման կատարմանը կարող են ներկա գտնվել:
Մինչդեռ մեղադրող Ծովակ Մնացականյանը պնդեց, որ իրավական փոխօգնության շրջանակներում պետք է կատարվի արտաշիրիմումը՝ նշելով այն կառուցակարգերը, որոնք առկա են իրավական փոխօգնության շրջանակներում: Ըստ մեղադրողի ՝ Հայաստանը պետք է իրավական փոխօգնության խնդրանքով դիմի Վրաստանի իրավապահներին:
Դատարանը հաջորդ նիստին այս հարցով որոշում կկայացնի:
Արաքս Մամուլյան
