09.06.2026 | 12:34
Ինչու Արփինե Սարգսյանը չի ներկայացել ԱԺ` բյուջեի կատարողականը ներկայացնելու
Բաքուն ու Երևանը շատ անելիք ունեն՝ կարգավորման հասնելու համար․ ՌԴ ԱԳՆ-ն հայտարարություն է տարածել նոյեմբերի 9-ի վերաբերյալ
Քաղաքականություն
07.11.2025 | 16:48
Ադրբեջանն ու Հայաստանը դեռ շատ անելիք ունեն հարաբերությունների կարգավորման գործընթացն անշրջելի դարձնելու համար, և Ռուսաստանը պատրաստ է օգնել։ Այս մասին ասվում է Ռուսաստանի արտաքին գործերի նախարարության հայտարարության մեջ, փոխանցում է ՏԱՍՍ-ը։
«Բաքուն ու Երևանը դեռ շատ անելիք ունեն երկկողմ հարաբերությունների կարգավորման գործընթացն անշրջելի դարձնելու համար, այդ թվում՝ խաղաղության պայմանագրի ստորագրում, Հարավային Կովկասի բոլոր երկրների և նրանց անմիջական հարևանների շահերից ելնելով տրանսպորտային և տնտեսական հաղորդակցությունների վերականգնում, պետական սահմանի արդարացի սահմանազատում և սահմանագծում, ինչպես նաև քաղաքացիական հասարակության շրջանակներում արդյունավետ կապերի հաստատում։ Ռուսական կողմը պատրաստ է շարունակել իր ադրբեջանցի և հայ գործընկերներին համապարփակ օգնություն ցուցաբերել բոլոր ոլորտներում, այդ թվում՝ 3+3 տարածաշրջանային համագործակցության պլատֆորմի (Ադրբեջան, Հայաստան, Վրաստան, Ռուսաստան, Իրան, Թուրքիա) շրջանակներում»,- ասվում է հայտարարության մեջ։
Ռուսաստանի ԱԳՆ-ն նշել է, թե երկրների ղեկավարների 2020 թվականի նոյեմբերի 9-ի հայտարարությունները՝ Լեռնային Ղարաբաղի հակամարտության գոտում լիակատար հրադադարի և բոլոր ռազմական գործողությունների մասին, 2021 թվականի հունվարի 11-ի հայտարարությունները՝ տարածաշրջանում բոլոր տնտեսական և տրանսպորտային կապերը ապաշրջափակելու համար եռակողմ աշխատանքային խմբի ստեղծման, 2021 թվականի նոյեմբերի 26-ի հայտարարությունները՝ երկու երկրների միջև պետական սահմանը սահմանազատելու հանձնաժողովներ ստեղծելու մասին, ինչպես նաև 2022 թվականի հոկտեմբերի 31-ի հայտարարությունները՝ Ռուսաստանի աջակցությամբ Ադրբեջանի և Հայաստանի միջև խաղաղության պայմանագրի կնքման ակտիվ նախապատրաստման կարևորության մասին, «ձևավորում են խաղաղության գործընթացի ճանապարհային քարտեզ»։
«Այս հայտարարությունները մնում են ուժի մեջ և չեն կորցրել իրենց պահանջարկը։ Եռակողմ ձևաչափով ստեղծված կարևոր հիմքերն ակտիվորեն օգտագործվում են ադրբեջանական և հայկական կողմերի կողմից, այդ թվում՝ անմիջական երկխոսության մեջ։ Այս համատեքստում ռուսական կողմը դրականորեն է գնահատել 2025 թվականի օգոստոսի 8-ին Վաշինգտոնում Ադրբեջանի և Հայաստանի արտգործնախարարների կողմից Վաշինգտոնում ստորագրված «Ադրբեջանի Հանրապետության և Հայաստանի Հանրապետության միջև խաղաղության և միջպետական հարաբերությունների հաստատման մասին» համաձայնագրի նախագծի նախաստորագրումը»,- ասվում է ՌԴ ԱԳՆ-ի հայտարարությունում։
Թարգմանությունը՝ Էմմա Չոբանյանի
