Անջելինա Ջոլին ուկրաինական Խերսոն է այցելել

Հոլիվուդյան դերասանուհի Անջելինա Ջոլին նախօրեին ուկրաինական Խերսոն է այցելել։ Այս մասին հայտնել են ուկրաինական տելեգրամ ալիքները և հանրային հեռուստաալիքը՝ հղում անելով տեղական ինքնակառավարման մարմինների աղբյուրներին, փոխանցում է DW-ի ռուսական ծառայությունը։

Ջոլիի այցի նպատակը չի նշվում, սակայն, նախնական հաղորդագրությունների համաձայն, նա այցելել է բժշկական հաստատություններ, զրուցել հասարակական կազմակերպությունների ներկայացուցիչների հետ։ Տելեգրամ ալիքները նաև հրապարակել են դերասանուհու լուսանկարը, որը, հավանաբար, արվել է ապաստարանում։ Ջոլին շփվել է երեխաների հետ խաղասենյակի վերածված նկուղում։

Հրապարակված տեսանյութի համաձայն՝ Խերսոնի ռազմական վարչակազմի ղեկավար Յարոսլավ Շանկոն Անջելինա Ջոլիին քաղաքի հուշամեդալ է նվիրում։

Խերսոն գնալու ճանապարհին դերասանուհին կանգ է առել Նիկոլաևի Զորակոչի և սոցիալական աջակցության տարածքային կենտրոնում, քանի որ նրա անվտանգության աշխատակցին պատրաստվել են մոբիլիզացնել։

Նշվում է, որ խոսքը Ջոլիին ուղեկցող վարորդի մասին է։ Պարզվել է, որ 1992 թվականին ծնված տղամարդը պահեստազորի սպա է, 2025 թվականի հունիսին ճանաչվել է թիկունքային զորամասերում ծառայության համար պիտանի, և որ զորահավաքի հետաձգման հաստատված հիմքեր չունի։

«Նրա ինքնությունը պարզվել է, որից հետո նա հանգիստ հեռացել է՝ իր գործերով զբաղվելու համար։ Ոչ մի խնդիր չի առաջացել։ Ամեն ինչ օրենքի սահմաններում է եղել»,- ասել է ТСН հեռուստաալիքի աղբյուրը։

Ռուսաստանի կողմից սանձազերծված լայնածավալ պատերազմի մեկնարկից ի վեր Անջելինա Ջոլին արդեն երկրորդ անգամ է այցելում Ուկրաինա։ 2022 թվականի ապրիլի վերջին դերասանուհին այցելել էր Լվով, եղել տեղի երկաթուղային կայարանում գտնվող փախստականների ընդունման կենտրոնում և գիշերօթիկ դպրոցում, ինչպես նաև հանդիպել է պատերազմից տուժած երեխաների հետ։

Չնայած դերասանուհին 2001 թվականից ի վեր ՄԱԿ-ի փախստականների հարցերով գերագույն հանձնակատարի գրասենյակի բարի կամքի դեսպան է, նրա այցը Ուկրաինա, ըստ որոշ տեղեկությունների, անձնական բնույթ է կրել։

Թարգմանությունը՝ Էմմա Չոբանյանի