11.09.2026 | 21:05
Փրկարարները Ալավերդիում 15 մետր խորությունից դուրս են բերել արգելափակված օտարերկրացուն
PKK-ի բանտարկված առաջնորդը բոլոր կողմերին կոչ է անում անկեղծ ջանքեր գործադրել Թուրքիայի խաղաղության ջանքերում
Քաղաքականություն
04.11.2025 | 20:19
Քուրդստանի աշխատավորական կուսակցության (PKK) բանտարկված առաջնորդ Աբդուլլահ Օջալանը կոչ է արել Թուրքիայի խաղաղության ջանքերին ներգրավված բոլոր կողմերին՝ գործել «զգայունությամբ և պատասխանատվությամբ»՝ հաջողություն ապահովելու համար։ Այս մասին ասվում է բանտում նրան այցելած երկրի գլխավոր քրդամետ կուսակցության պատվիրակության կողմից հրապարակված հաղորդագրության մեջ, գրում է Turkish Minute-ը։
PKK-ի հիմնադիր Օջալանը ղեկավարում է թուրքական պետության դեմ 40-ամյա զինված ապստամբությունից անցում դեպի այն, ինչ նա անվանում է քրդերի իրավունքների համար ժողովրդավարական քաղաքական պայքար։
Օգոստոսից ի վեր միջկուսակցական խորհրդարանական հանձնաժողովը մշակում է խաղաղության ջանքերի իրավական շրջանակ, ներառյալ՝ Օջալանի բանտարկության և Քուրդստանի աշխատավորական կուսակցության նախկին մարտիկների համար հնարավոր անվտանգության երաշխիքների վերաբերյալ դրույթները։
«Դրական փուլ անցնելու համար կարևոր է, որ բոլորը գործեն զգայունությամբ, լրջությամբ և պատասխանատվության զգացումով։ Դրա հիմքը պետք է լինի քրդական ճանաչումը բոլոր չափումներով ներառելը երկրի իրավական շրջանակում և ամուր անցումային գործընթացի մեջ ներգրավվելը»,- գրել է Օջալանը։
PKK-ն պաշտոնապես հրաժարվել է զինված գործողություններից մայիսին՝ ավելի քան 40 տարի տևած հակամարտությունից հետո, որը խլել է ավելի քան 40,000 մարդու կյանք: Անցյալ ամիս խմբավորումը հայտարարել էր, որ իր մնացած մարտիկներին դուրս է բերել Թուրքիայից դեպի Հյուսիսային Իրաք՝ ավարտելով մեկ տարի առաջ մեկնարկած խաղաղության ծրագրի առաջին փուլը:
Քրդամետ «Ժողովուրդների հավասարություն և ժողովրդավարություն» կուսակցությունը (DEM), որն ունի խորհրդարանում երրորդ ամենամեծ խմբակցությունը, կոչ է արել սկսել երկրորդ փուլը՝ կենտրոնանալով քրդերի իրավունքները ճանաչելու քաղաքական և իրավական բարեփոխումների վրա։
Քրդերը կազմում են Թուրքիայի 86 միլիոն բնակչության շուրջ 20 տոկոսը: Վերլուծաբանները նշում են, որ խաղաղության ջանքերի առաջընթացը կախված կլինի ինչպես կառավարության կողմից բարեփոխումների մասին օրենսդրություն ընդունելու պատրաստակամությունից, այնպես էլ քուրդ քաղաքական գործիչների շարունակական ներգրավվածությունից:
Թարգմանությունը՝ Էմմա Չոբանյանի
