12.09.2026 | 10:41
Լիբանանի նախագահը հանդիպել է ՀՀ դեսպանին
Բաքվում Իրանի դեսպանը հայտարարել է, թե «պատերազմում Ադրբեջանի հաղթանակը համագործակցության զարգացման նոր հնարավորություններ է ստեղծել»
Քաղաքականություն
04.11.2025 | 18:53
«Պատերազմում Ադրբեջանի հաղթանակը և օկուպացված տարածքների ազատագրումը նոր հնարավորություններ են ստեղծել Բաքվի և Թեհրանի միջև երկկողմ համագործակցության զարգացման համար»։ Այս մասին ադրբեջանական լրատվամիջոցներին ասել է Բաքվում Իրանի դեսպան Մոջթաբա Դեմիրչիլուն, որն այցով Նախիջևանում է։
Նա նշել է, որ Նախիջևանը հատուկ տեղ է զբաղեցնում երկու երկրների հարաբերություններում։ Դեմիրչիլուի խոսքով՝ երկրների միջև հարաբերությունների ներկայիս փուլը լայն հեռանկարներ է բացում։
«Ադրբեջանի հաղթանակը և նախկինում օկուպացված հողերի ազատագրումը նոր հնարավորություններ են ստեղծել։ Մենք պետք է արդյունավետորեն օգտագործենք այս ներուժը՝ մեր ժողովուրդներին է՛լ ավելի մերձեցնելու և մեր եղբայրական ու բարեկամ երկրների միջև համագործակցությունը խորացնելու համար»,- հավելել է դիվանագետը։
Նա նաև նշել է, որ Իրանի և Ադրբեջանի միջև գործում է չորս սահմանային անցակետ՝ Աստարա, Բիլասուվար, Ջուլֆա և Շախտախտի-Պոլդաշտ ուղղությամբ։
Դիվանագետը հայտնել է, որ առաջիկա ամիսներին Աղբենդ-Կալալա շրջանում կբացվի նոր սահմանային անցակետ։
«Աշխատանքները շատ լավ են ընթանում, կամրջի շինարարությունը կավարտվի դեկտեմբերի վերջին։ Գերատեսչությունների կողմից անցակետի տեղադրման նախապատրաստական աշխատանքները նույնպես ընթացքի մեջ են։ Սա նշանակում է, որ նոր հնարավորություններ կբացվեն Ադրբեջանի և Իրանի միջև տնտեսական կապերի ընդլայնման համար։ Ինչպես հայտնի է՝ վերջին 30 տարիների ընթացքում Նախիջևանն օգտագործել է Իրանի տարածքը Ադրբեջանի մյուս շրջանների հետ ազատ և հարմար հաղորդակցության համար»,- ասել է իրանցի դեսպանը։
Նա նշել է, որ նոր ճանապարհային կամուրջը շահագործման հանձնելուց հետո Նախիջևանից դեպի Ադրբեջանի մայրցամաքային մաս ճանապարհը կդառնա ավելի կարճ և ավելի քիչ ժամանակ կպահանջի։
Թարգմանությունը՝ Էմմա Չոբանյանի
