30.05.2026 | 19:53
«Յունիսպորտը»` ֆուտզալի Հայաստանի չեմպիոն. ՏԵՍԱՆՅՈՒԹ
RSF-ը Ալիևին և Իվանիշվիլիին անվանել է «մամուլի ազատության գիշատիչներ»
Քաղաքականություն
04.11.2025 | 12:09
«Լրագրողներ առանց սահմանների» (RSF) կազմակերպությունն Ադրբեջանի նախագահ Իլհամ Ալիևին և Վրաստանի իշող «Վրացական երազանք» կուսակցության հիմնադիր Բիձինա Իվանիշվիլիին անվանել է «մամուլի ազատության գիշատիչներ»՝ այդ երկրներում մամուլի ազատությունը ճնշելու գործում ունեցած դերի համար։ RSF-ը հրապարակել է մամուլի ազատության 34 գիշատիչների ցուցակը՝ լրագրողների դեմ հանցագործությունների անպատժելիության վերացման միջազգային օրվա առթիվ, գրում է OC Media-ն։
«Նրանց մեթոդները տարբերվում են, բայց նրանց նպատակները համընկնում են՝ լռեցնել անկախ լրատվամիջոցների ձայները և ոտնահարել լուրերի ու տեղեկատվության իրավունքը։ Սպանություն, բանտարկություն, զրպարտություն, քարոզչություն, տրոլլների բանակներ՝ այս ամենը լռություն պարտադրելու միջոցներ են»,- նշել է RSF-ը։
Ցուցակում ընդգրկված են նաև Ռուսաստանի նախագահ Վլադիմիր Պուտինը, Բելառուսի նախագահ Ալեքսանդր Լուկաշենկոն, Իրանի գերագույն առաջնորդ Ալի Խամենեին, Հունգարիայի վարչապետ Վիկտոր Օրբանը, Իսրայելի բանակը, ամերիկացի միլիարդատեր Իլոն Մասկը և այլք։
Ալիևն ընդգրկվել է որպես «մամուլի գիշատիչ»՝ Ադրբեջանում լրագրողներին լռեցնելու համար․ RSF-ը նշել է, որ նրա նախագահության օրոք Ադրբեջանը «դարձել է մեդիա անապատ»։ Նշվում է Ալիևի ռեժիմի կողմից անկախ լրատվամիջոցների նկատմամբ ճնշումները, 26 լրագրողների ձերբակալությունը և Abzas Media-ի լրագրողներին երկարատև ազատազրկման դատապարտելը։
Ադրբեջանի լրատվամիջոցների դեմ ուղղված հետապնդումները սկսվել են իշխանությունների կողմից Abzas Media-ի վրա հարձակումից և մի քանի աշխատակիցների, այդ թվում՝ տնօրեն Ուլվի Հասանլիի և գլխավոր խմբագիր Սևինջ Վագըֆգիզիի ձերբակալությունից ու հետագա դատապարտումից։ Այդ ժամանակից ի վեր Ադրբեջանը ձերբակալել է մի շարք այլ լրատվամիջոցների, այդ թվում՝ «Meydan TV»-ի, «Toplum TV»-ի և «Kanal 13»-ի լրագրողների։ 2025 թվականի «Լրագրողներ առանց սահմանների» կազմակերպության մամուլի ազատության ինդեքսում այն 180-ից զբաղեցնում է 167-րդ տեղը։
Իր հերթին, Իվանիշվիլին ցուցակում ընդգրկվել է լրատվամիջոցների նկատմամբ տնտեսական ճնշումների համար, ընդ որում՝ RSF-ն ընդգծում է, որ նա «շարունակում է մնալ Վրաստանում իշխանության կենտրոնը՝ չնայած քաղաքական կյանքից պաշտոնապես հեռանալուն»։
«Նրա բիզնես կայսրությունը երաշխավորում է նրա վճռորոշ ազդեցությունը, քանի որ մի քանի կոմերցիոն հեռուստաալիքներ, այդ թվում՝ «Իմեդի» և «Ռուսթավի 2» հեռուստաալիքները, հեռարձակում են տեսակետներ նրա հիմնադրած «Վրացական երազանք» կուսակցության օգտին»,- գրել է RSF-ը։
Նշվում է, որ նրա ազդեցության տակ Վրաստանում բազմակարծության անկումը և կառավարության կողմից լրագրողների նկատմամբ զրպարտությունն ու հետապնդումները, ինչպես նաև լրատվամիջոցների ներկայացուցիչների դեմ «անպատժելիորեն» իրականացված բռնի հարձակումները։
Ընդգծվում է նաև Վրաստանի կողմից մեդիա մենեջեր Մզիա Ամագլոբելիի երկամյա դատապարտումը և մամուլի ազատությունը չհարգելու միջոցով Վրաստանի՝ ԵՄ-ին անդամակցության գործընթացը սաբոտաժի ենթարկելը։
Վրաստանը 2025 թվականի RSF մամուլի ազատության ինդեքսում զբաղեցրել է 114-րդ տեղը։
Թարգմանությունը՝ Էմմա Չոբանյանի
