Ուկրաինական ԱԹՍ-ները հարձակվել են Բաշկորտոստանում նավթաքիմիական գործարանի վրա․ ՏԵՍԱՆՅՈՒԹ

Բաշկորտոստանի ղեկավար Ռադի Խաբիրովը հայտարարել է, որ նոյեմբերի լույս 4-ի գիշերը երկու ուկրաինական անօդաչու թռչող սարքեր են հարձակվել Ստերլիտամակի արդյունաբերական համալիրի վրա։ Նա ասել է, որ երկու անօդաչու թռչող սարքերն էլ խոցվել  են, իսկ բեկորներն ընկել են օժանդակ արտադրամասի մոտ, փոխանցում է Meduza-ն։

«Զոհեր ու տուժածներ չկան, գործարանը բնականոն աշխատում է»,- գրել է հանրապետության ղեկավարը տելեգրամում։

Ստերլիտամակի իշխանությունները, իրենց հերթին, հայտնել են նավթաքիմիական գործարանում տեղի ունեցած պայթյունի մասին, որի հետևանքով մասամբ փլուզվել է ջրամաքրման կայանը։ Վարչակազմի տելեգրամ ալիքում հրապարակված հայտարարության համաձայն՝ տուժածների մասին տեղեկություններ չկան։

Astra տելեգրամ ալիքը հրապարակել է Ստերլիտամակում ականատեսների կողմից արված տեսանյութեր և լուսանկարներ, որոնք, ենթադրաբար, ցույց են տալիս նավթաքիմիական գործարանի տարածքում ծխի մի քանի կույտեր։

Ստերլիտամակի նավթաքիմիական գործարանն արտադրում է կաուչուկ և ավիացիոն բենզին։

Astra-ն, հղում անելով ականատեսներին, հաղորդում է նաև Նիժնի Նովգորոդի մարզի Կստովո քաղաքում՝ արդյունաբերական գոտու մոտ, որտեղ գտնվում են «СИБУР-Кстово» նավթաքիմիական գործարանը և «Лукойл-Нижегороднефтеоргсинтез» նավթավերամշակման գործարանը, պայթյունների մասին։

Ռուսաստանի պաշտպանության նախարարությունը հայտարարել է, որ ՀՕՊ ուժերը գիշերը ոչնչացրել են ուկրաինական 85 ԱԹՍ, այդ թվում՝ 40-ը՝ Վորոնեժի մարզում, 20-ը՝ Նիժնի Նովգորոդի մարզում և երկուսը՝ Բաշկորտոստանի տարածքում։

Թարգմանությունը՝ Էմմա Չոբանյանի