Գեղարքունիքի մարզպետն ընդունեց եւ շնորհավորեց համայնքների նորընտիր ղեկավարներին

Գեղարքունիքի մարզպետ Գնել Սանոսյանն ընդունեց Ներքին Գետաշեն, Դդմաշեն, Երանոս, Սարուխան, Մաքենիս, Վերին Գետաշեն համայնքների նորընտիր ղեկավարներ Կարո Գևորգյանին, Ավետիս Ավետիսյանին, Սաշա Բավեյանին, Լյովա Աբրահամյանին, Ռադիկ Ավետիսյանին եւ Տիգրան Մուրադյանին, ովքեր հաղթել էին այս տարվա հոկտեմբերի 21-ին կայացած ՏԻՄ ընտրություններում:

«Շնորհավորում եմ բոլորիդ համայնքի ղեկավարի պատասխանատու պաշտոնում ընտրվելու կապակցությամբ, մաղթում արգասաբեր աշխատանք: Մեր համայնքներին հարկավոր են սրտացավ, բանիմաց, ջանասեր ղեկավարներ, որպեսզի մեր երկիրը կարողանա օր առաջ հաղթահարել ստեղծված դժվարին իրավիճակը, տարիներով կուտակված հիմնախնդիրները: Ես առավել կարեւորում եմ աշխատանքը, քան թե թիմակից լինել-չլինելը եւ ձեր աշխատանքից ակնկալում եմ տեսանելի արդյունքներ:Համոզված եմ, որ ցանկացած համայնքի ղեկավար ի վիճակի է իր համայնքում եղանակ փոխել, ձեռքբերումներ արձանագրել, լուծում տալ ցանկացած հիմնախնդրի, եթե ունի կամք, իմացություն ու ցանկություն: Առաջարկում եմ՝ նորովի նայել ձեր աշխատանքին, վերագնահատել անցյալի բացերն ու սխալները եւ մեզ հետ ձեռք ձեռքի տված աշխատել: Մենք ունենք հեռանկարային ու հավակնոտ ծրագրեր, որոնք կյանքի պետք է կոչենք համատեղ ջանքերով: Մենք մեր լիազորությունների շրջանականերում կլինենք ձեր աջակիցն ու գործընկերը ցանկացած հարցում»,-նշեց մարզպետը:
«Արմենպրես»-ի հաղորդմամբ՝ Գնել Սանոսյանը միաժամանակ առաջարկեց համայնքների նորընտիր ղեկավարներին՝ առավել ուշադրություն սեւեռել տեղական բյուջեների սեփական եկամուտների ամբողջական հավաքագրման վրա: «Որքան շատ միջոցներ հավաքագրեն համայնքները, եկող տարի դրսից այնքան շատ միջոցներ կներգրավվեն մեր համայնքների վերականգնման ու զարգացման մեջ»,- հավելեց մարզպետը:
Համայնքների նորընտիր ղեկավարները մարզպետ Գնել Սանոսյանի հետ քննարկեցին մի շարք ընթացիկ կամ առաջնահերթ լուծում պահանջող հարցեր: