31.10.2026 | 22:35
Հայաստանի ներկայացուցիչ Ալինա Չարաևան դուրս եկավ եզրափակիչ
Թրամփը հայտարարել է, որ Մադուրոյի նախագահության օրերը «հաշված են»
Քաղաքականություն
03.11.2025 | 14:19
ԱՄՆ նախագահ Դոնալդ Թրամփը ոչ հստակ ազդանշաններ է ուղարկել Վենեսուելայում ԱՄՆ-ի հնարավոր միջամտության վերաբերյալ՝ նվազեցնելով հարավամերիկյան երկրի դեմ անխուսափելի պատերազմի մասին մտահոգությունները, սակայն ասելով, որ նրա առաջնորդ Նիկոլաս Մադուրոյի պաշտոնավարման օրերը հաշված են, գրում է France 24-ը։
Ըստ հրապարակման՝ Թրամփի խոսքերը հնչում են այն ժամանակ, երբ Միացյալ Նահանգները ռազմական ստորաբաժանումներ է կուտակում Կարիբյան ավազանում, նաև բազմաթիվ հարվածներ է հասցրել ենթադրյալ թմրանյութերի ապօրինի շրջանառությամբ զբաղվող նավերին՝ սպանելով տասնյակ մարդկանց։
CBS-ի եթերում պատասխանելով հարցին՝ արդյո՞ք Միացյալ Նահանգները պատերազմելու է Վենեսուելայի դեմ, Թրամփը պատասխանել է․ «Կասկածում եմ։ Ես այդպես չեմ կարծում»։
Մադուրոն, որը Միացյալ Նահանգներում մեղադրվում է թմրանյութերի ապօրինի շրջանառության մեջ, մեղադրել է Վաշինգտոնին թմրանյութերի ապօրինի շրջանառությունը որպես պատրվակ օգտագործելու մեջ՝ Կարակասում «ռեժիմի փոփոխություն պարտադրելու» համար՝ Վենեսուելայի նավթը զավթելու նպատակով։
Վերջին շաբաթների ընթացքում Կարիբյան ավազանում և Խաղաղ օվկիանոսում նավերի վրա ԱՄՆ-ի ավելի քան 15 հարվածների հետևանքով զոհվել է առնվազն 65 մարդ։ Վերջին միջադեպը տեղի է ունեցել շաբաթ օրը, ինչը քննադատության է արժանացել տարածաշրջանի կառավարությունների կողմից։
Փորձագետները նշում են, որ սեպտեմբերի սկզբին սկսված հարձակումները հավասար են արտադատական սպանությունների։
Վաշինգտոնը դեռևս չի հրապարակել որևէ ապացույց, որ իր թիրախները թմրանյութերի մաքսանենգություն էին իրականացնում կամ սպառնալիք էին ներկայացնում Միացյալ Նահանգների համար։
Թարգմանությունը՝ Էմմա Չոբանյանի
