15.03.2026 | 20:59
Լարսը շարունակում է փակ մնալ բոլոր տեսակի տրանսպորտային միջոցների համար
Աֆղանստանում ուժեղ երկրաշարժի հետևանքով զոհվել է առնվազն 20 մարդ, 300-ից ավելի վիրավոր կա․ ՏԵՍԱՆՅՈՒԹ
Քաղաքականություն
03.11.2025 | 11:35
Աֆղանստանում տեղի ունեցած 6,3 մագնիտուդով երկրաշարժի հետևանքով առնվազն 20 մարդ է զոհվել։ Այս մասին հայտարարել է Թալիբանը, գրում է Sky news-ը։
Ստորգետնյա ցնցումը գրանցվել է կեսգիշերն անց՝ ժամը 00:59-ի սահմաններում, Մազարի Շարիֆ քաղաքի մոտակայքում, որը գտնվում է հյուսիսային Բալխ նահանգում: Թալիբանի առողջապահության նախարարությունը հավելել է, որ 320 մարդ վիրավորվել է, նախարարության խոսնակ Շարֆատ Զամանն էլ հայտարարել է, որ զոհվածների և վիրավորների թիվը կարող է աճել։
ԱՄՆ երկրաբանական ծառայությունը (USGS) երկրաշարժի հետևանքների իր համակարգում նարնջագույն տագնապ է հայտարարել՝ ենթադրություն հայտնելով, որ «զգալի թվով զոհերի հավանականությունը մեծ է, և աղետը կարող է լայնածավալ լինել»։
Բալխ նահանգի գործադիր իշխանության խոսնակ Հաջի Զաիդը հավելել է, որ երկրաշարժը ոչնչացրել է քաղաքի սրբավայրի՝ Կապույտ մզկիթի մի մասը։
Աֆղանստանում ՄԱԿ-ի գրասենյակը X-ում հայտարարել է, որ գտնվում է տեղում՝ գնահատելով կարիքները և օգնություն տրամադրում։
«Մենք կանգնած ենք տուժած համայնքների կողքին և կտրամադրենք անհրաժեշտ աջակցությունը»,- ասվում է հայտարարության մեջ։
Մազարի Շարիֆը Աֆղանստանի հինգերորդ խոշորագույն քաղաքն է՝ մոտ 523,000 բնակչությամբ։
Գտնվելով երկու խոշոր ակտիվ բեկվածքների վրա՝ Աֆղանստանը հատկապես խոցելի է երկրաշարժերի նկատմամբ. սեպտեմբերին երկրի արևելյան շրջաններում տեղի ունեցած 6 մագնիտուդով երկրաշարժի հետևանքով զոհվել էր ավելի քան 1400 մարդ, առնվազն 3250-ը՝ վիրավորվել։
2015 թվականին Աֆղանստանի հյուսիս-արևելքում երկրաշարժ էր տեղի ունեցել, որի հետևանքով երկրում և հարևան Պակիստանում մի քանի հարյուր մարդ էր զոհվել։
Թարգմանությունը՝ Էմմա Չոբանյանի
