09.10.2026 | 19:14
«Խորապես մտահոգիչ է, որ ապօրինության հարթակի է վերածվում նաև Ազգային ժողովը». Մայր Աթոռի հայտարարությունը
Նոյեմբերի 2-ին Գարեգին Բ-ի գահակալության 26-րդ տարեդարձի առթիվ Մայր տաճարում պատարագ կմատուցվի
31.10.2025 | 11:50
Մայր Աթոռ Սուրբ Էջմիածնի տեղեկատվական համակարգից հայտնում են, որ այս կիրակի՝ նոյեմբերի 2-ին, Գարեգին Բ-ի գահակալության 26-րդ տարեդարձի առիթով Մայր տաճարում պատարագ կկատարվի և դուրս կբերվի Սկևռայի սրբոց մասանց պահարանը։
«Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի օծման և գահակալության 26-րդ տարեդարձի առիթով, առաջիկա կիրակի՝ նոյեմբերի 2-ին, ընկալյալ կարգի համաձայն, հընթացս Սուրբ և Անմահ Պատարագի կկատարվի Հայրապետական մաղթանք և Սուրբ Էջմիածնում հավատացելոց երկրպագության համար դուրս կբերվի Սկևռայի սրբոց մասանց պահարանը»,- ասված է հաղորդագրությունում։
Հիշեցնենք, որ ՀՀ վարչապետ Նիկոլ Փաշինյանը, որը հոկտեմբերի 26-ին մասնակցել էր Հովհաննավանքում մատուցված պատարագին, հայտարարել է, որ առաջիկա կիրակի՝ նոյեմբերի 2-ին ևս մասնակցելու է Հովհաննավանքի պատարագին, որի պատարագիչը կարգալույծ հռչակված Տեր Արամ քահանա Ասատրյանն է։
Հավելենք, որ նախօրեին Մայր Աթոռը հայտարարություն էր տարածել՝ նշելով, որ բռնազավթված է Հովհաննավանքը, որի հետևանքով խաթարվում է տեղում ծառայության նշանակված Տեր Սարգիս քհն․ Սարգսյանի և Տեր Մանուկ քնհ․ Զեյնալյանի հոգևոր ծառայությունը։
