18.05.2026 | 22:33
Անդրես Ինիեստայի ակադեմիայի ներկայացուցիչներն այցելել են Հայաստան․ ՏԵՍԱՆՅՈՒԹ
Լատվիայի խորհրդարանը կողմ է քվեարկել կանանց բռնությունից պաշտպանող Ստամբուլյան կոնվենցիայից դուրս գալուն
Քաղաքականություն
31.10.2025 | 22:18
Լատվիայի խորհրդարանը քվեարկել է կանանց նկատմամբ բռնության կանխարգելման մասին պայմանագրից երկրի դուրս գալու օգտին՝ պնդելով, որ այն խթանում է «գենդերային կողմնակալության» տեսությունները, գրում է France 24-ը։
Քվեարկության արդյունքում Լատվիան կդառնա Եվրոպական Միության առաջին երկիրը, որը դուրս կգա Ստամբուլյան կոնվենցիայից, որը նույն խորհրդարանը վավերացրել էր 2024 թվականի նոյեմբերին։ Օրենքն այժմ պետք է ստորագրի նախագահ Էդգարս Ռինկևիչը, որը նշել է, որ կողմ չէ դրան, բայց նաև ակնարկել, որ կարող է չեղյալ համարել խորհրդարանական որոշումը։
Եվրոպայի խորհրդի կոնվենցիան պահանջում է, որ ստորագրող կողմերը մշակեն օրենքներ և քաղաքականություն՝ ուղղված կանանց նկատմամբ բռնության և ընտանեկան ֆիզիկական բռնության վերացմանը։
Աջակողմյան ընդդիմադիր կուսակցությունները քվեարկել են պայմանագրից դուրս գալու օգտին, մինչդեռ կենտրոնամետ վարչապետ Էվիկա Սիլինայի գլխավորած կառավարող կոալիցիան բաժանվել է «Կանաչների և ֆերմերների միության» ներկայացուցիչները քվեարկել են պայմանագրից դուրս գալու օգտին, իսկ մյուս կուսակցությունները՝ մնալու օգտին։
Եվրոպայի խորհուրդը բազմիցս մերժել է այն պնդումները, որ պայմանագիրը պարտադրում է գենդերային տեսություններ, մասնավորապես, 2022 թվականին նշելով, որ «Ստամբուլի կոնվենցիան չի սահմանում որևէ նոր նորմ գենդերային ինքնության կամ սեռական կողմնորոշման վերաբերյալ»։
Լատվիական աջակողմյանները պնդում են, որ կոնվենցիայից դուրս գալը չի թուլացնի կանանց նկատմամբ բռնության դեմ պայքարը, քանի որ ազգային օրենքները բավարար են։
Կանանց իրավունքների պաշտպանությամբ զբաղվող խմբերը վերջին շաբաթներին մի քանի ցույցեր են կազմակերպել Ռիգայում։
Լատվիայի աջակողմյանները նաև աջակցում են վերջերս առաջարկված փոփոխությանը, որը կսահմանափակի աբորտի հասանելիությունը երկրում։
Թարգմանությունը՝ Էմմա Չոբանյանի
