29.06.2026 | 23:29
Ալեն Սիմոնյանը պարգևատրել է պետական պահպանության ծառայության աշխատողներին
«Լուկoյլ»-ը համաձայնել է վաճառել իր արտասահմանյան ակտիվները շվեյցարական Gunvor-ին, որը հիմնադրել է ռուս օլիգարխ Գենադի Տիմչենկոն
Քաղաքականություն
30.10.2025 | 20:43
Ռուս օլիգարխ Գենադի Տիմչենկոյի և Շվեդիայից նրա գործընկեր Թորբյորն Թյորնկվիստի կողմից հիմնադրված շվեյցարական Gunvor Group-ը «Լուկoյլ»-ին առաջարկ է ներկայացրել LUKOIL International GmbH-ն գնելու համար, որի միջոցով ռուսական նավթային հսկան կառավարում է իր միջազգային ակտիվները: Գործարքը պատրաստվում է «Լուկoյլ»-ի դեմ ԱՄՆ պատժամիջոցների ֆոնին: Ռուսական ընկերությունը համաձայնել է գործարքին և պարտավորվել չբանակցել այլ պոտենցիալ գնորդների հետ։ Այս մասին հաղորդում է ընկերության մամուլի ծառայությունը, գրում է The Insider-ը։
Պայմանագրի կնքումը ենթակա է ԱՄՆ-ի Արտասահմանյան ակտիվների վերահսկողության գրասենյակի (OFAC) հաստատմանը և, անհրաժեշտության դեպքում, այլ երկրների կարգավորող մարմինների հաստատմանը: Gunvor-ը գրանցված է Կիպրոսում, բայց փաստացի գտնվում է Ժնևում և համարվում է աշխարհի խոշորագույն նավթային առևտրականներից մեկը: Մինչև գործարքի ավարտը կողմերը նախատեսում են երկարաձգել ԱՄՆ-ի գործող լիցենզիան՝ իրենց միջազգային ակտիվների և բանկային ծառայությունների անխափան գործունեությունն ապահովելու համար:
Վաճառքի որոշումը պայմանավորված է ԱՄՆ-ի և Մեծ Բրիտանիայի կողմից «Լուկօյլ»-ի և դրա դուստր ձեռնարկությունների նկատմամբ սահմանված պատժամիջոցներով: Հոկտեմբերի 27-ին ընկերությունը հայտարարել էր իր արտասահմանյան ակտիվները վաճառելու մտադրության մասին և այժմ առաջին անգամ անվանել է գնորդին: LUKOIL International GmbH-ը Ավստրիայում գրանցված հոլդինգային ընկերություն է, որի միջոցով կորպորացիան կառավարում է տասնյակ դուստր ձեռնարկություններ Եվրոպայում, Ասիայում և Աֆրիկայում:
Gunvor Group-ը հիմնադրվել է 2000 թվականին ռուս օլիգարխ Գենադի Տիմչենկոյի և շվեդ առևտրական Տորբյորն Տյորնկվիստի կողմից: 2014 թվականին Տիմչենկոն իր բաժնեմասը վաճառել է գործընկերոջը՝ ԱՄՆ պատժամիջոցների սահմանման նախօրեին: Այդ ժամանակ ԱՄՆ ֆինանսների նախարարությունը պնդում էր, որ Վլադիմիր Պուտինը՝ Տիմչենկոյի միջոցով, «կարող է ներդրումներ ունենալ Gunvor-ում և հասանելիություն ունենալ դրա միջոցներին»: Հետագայում ընկերությունը հայտարարել էր, որ դադարեցրել է ռուսական նավթի առևտուրը, բացառությամբ պատժամիջոցներով թույլատրված փոքր ծավալների:
Տիմչենկոն մնում է Ռուսաստանի ամենահարուստ մարդկանցից մեկը և Վլադիմիր Պուտինի մերձավոր շրջապատի անդամ է։ Նրա ներդրումային ընկերությունը՝ «Վոլգա Գրուպը», վերահսկում է «Նովատեկ» և «Սիբուր» ընկերություններում բաժնեմասերը։Ինքը՝ Տիմչենկոն, գտնվում է ԱՄՆ-ի, ԵՄ-ի և Մեծ Բրիտանիայի պատժամիջոցների տակ, իսկ նրա ընկերությունները ներգրավված են նավթի մատակարարումների և արտասահմանում ռուսական նախագծերի ֆինանսավորման հետաքննություններում։ «Դոսյե»ի հետաքննության համաձայն՝ գործարարի հետ կապված ընկերությունները շարունակում են գործել կեղծ գործընկերների միջոցով, մասնավորապես, Իվան Եգորովի, որը, ըստ լրագրողների, մասնակցել է Gunvor-ի գործարքներին և օգնել է խուսափել Արևմուտքի պատժամիջոցներից։
Թարգմանությունը՝ Էմմա Չոբանյանի
