09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
ԱՄՆ-ը Գերմանիային վեց ամիս ժամանակ է տվել՝ «Ռոսնեֆտ»-ի գերմանական ակտիվների սեփականության հարցը լուծելու համար․ Bloomberg
Քաղաքականություն
28.10.2025 | 16:45
Bloomberg-ի տվյալներով՝ ԱՄՆ-ը Գերմանիայի կառավարությանը վեցամսյա ժամկետ է տվել՝ ռուսական «Ռոսնեֆտ» կոնցեռնի գերմանական ակտիվների սեփականության կառուցվածքը կարգավորելու համար։ Սա թույլ է տալիս «Ռոսնեֆտ»-ի գերմանական վերահսկողությանը փոխանցված դուստր ձեռնարկություններին ժամանակավորապես ազատվել պատժամիջոցներից։ Այս մասին հայտնել են լրատվամիջոցի տեղեկացված աղբյուրները, փոխանցում է DW-ի ռուսական ծառայությունը։
ԱՄՆ նախագահ Դոնալդ Թրամփի վարչակազմը գերմանական կողմին տեղեկացրել է, որ դիտարկում է «Rosneft Deutschland»-ին չվերականգնվող սահմանափակ ընդհանուր լիցենզիա տրամադրելու հարցը, հայտնել են Bloomberg-ի աղբյուրները՝ անանունության պայմանով։
Բեռլինն ուսումնասիրում է այս առաջարկը և մտադիր է պատասխանել առաջիկա օրերին։ Աղբյուրներից մեկի համաձայն՝ Գերմանիայի էկոնոմիկայի նախարար Կատերինա Ռայխեն մտադիր է քննարկել այս հարցը այս շաբաթ Տորոնտոյում կայանալիք G7 հանդիպման ժամանակ։
Ըստ Bloomberg-ի՝ չնայած այս տարբերակը կնվազեցնի Գերմանիայում նավթավերամշակման խափանումների ռիսկը մոտ ապագայում՝ ԱՄՆ պատժամիջոցների սահմանման պայմաններում, այն մեծացնում է Բեռլինի վրա ճնշումը՝ մշակելու «Ռոսնեֆտ»-ի դուստր ձեռնարկությունների համար սեփականության կառուցվածք, որը կբացառի Ռուսաստանի մասնակցությունը 2026 թվականի մարտին հոգաբարձության ժամկետի ավարտից հետո։
Հոկտեմբերի 22-ին Միացյալ Նահանգները նոր պատժամիջոցներ է սահմանել Ռուսաստանի դեմ՝ «խաղաղության գործընթացի նկատմամբ Ռուսաստանի լուրջ հետաքրքրության բացակայության» պատճառով: Սև ցուցակում ներառված են Ռուսաստանի երկու խոշորագույն նավթային ընկերությունները՝ «Ռոսնեֆտը» և «Լուկօյլը», ինչպես նաև Ռուսաստանում գտնվող դրանց դուստր ձեռնարկությունները։Բացի այդ՝արգելափակվել են բոլոր իրավաբանական անձինք, որոնք «մեկ կամ ավելի արգելափակված կազմակերպությունների 50%-ին կամ ավելիին» են պատկանում: Խախտումների համար նախատեսվում է «քաղաքացիական կամ քրեական պատասխանատվություն ԱՄՆ և օտարերկրյա քաղաքացիների համար»: «Rosneft Deutschland»-ը՝ «Ռոսնեֆտ»-ի գերմանական դուստր ձեռնարկությունները և «RN Refining & Marketing»-ը ցուցակում չեն։
Ռուսաստանի կողմից Ուկրաինա լայնածավալ ներխուժումից հետո Գերմանիայի իշխանությունները զրկել են «Ռոսնեֆտին» իր գերմանական դուստր ձեռնարկությունների՝ «Rosneft Deutschland» և «RN Refining & Marketing» ընկերությունների նկատմամբ վերահսկողությունից և դրանք փոխանցել Դաշնային ցանցային գործակալության արտաքին վստահության կառավարմանը: «Ռոսնեֆտը» պահպանել է սեփականության իրավունքը։
«Rosneft Deutschland»-ը կազմում է Գերմանիայի նավթավերամշակման հզորությունների մոտ 12%-ը: Ընկերությունը բաժնեմասեր ունի Գերմանիայի երեք խոշոր նավթավերամշակման գործարաններում՝ PCK Schwedt-ում Շվեդտում, MiRo-ում Կարլսրուեում և Bayernoil-ում Ֆոհբուրգ ան դեր Դոնաուում:
Թարգմանությունը՝ Էմմա Չոբանյանի
