Ճապոնիայի վարչապետը խոստացել է Թրամփին առաջադրել Խաղաղության Նոբելյան մրցանակի

Ճապոնիայի նորանշանակ վարչապետ Սանաե Տակաիչին գովեստի խոսքեր է ասել ԱՄՆ նախագահ Դոնալդ Թրամփին Տոկիո կատարած այցի ժամանակ և խոստացել «կապերի ոսկե դարաշրջան» սկսել՝ նախքան Վաշինգտոնի հետ կարևորագույն հանքանյութերի անվտանգության վերաբերյալ համաձայնագիր կնքելը։ Սպիտակ տունը հայտնել է, որ Ճապոնիայի առաջին կին վարչապետ Տակաիչին գովաբանել է Թրամփի ներգրավվածությունը հակամարտությունների կարգավորման միջնորդության գործում և հայտարարել, որ նրան առաջադրելու է Նոբելյան խաղաղության մրցանակի, գրում է France 24-ը։

«Ես կցանկանայի իրականացնել Ճապոնիա-ԱՄՆ դաշինքի նոր ոսկեդարը, որտեղ և՛ Ճապոնիան, և՛ Միացյալ Նահանգները կդառնան ավելի ուժեղ և ավելի բարգավաճ»,- ասել է Տակաիչին։

Կողմերը համաձայնագիր են ստորագրել, որը նպատակ ունի «հասնել կարևորագույն հանքանյութերի և հազվագյուտ մետաղների մատակարարման շղթաների դիմադրողականությանը և անվտանգությանը», ասվում է հրապարակման մեջ։

Պեկինն այս ամիս հայտարարել էր հազվագյուտ մետաղների արդյունաբերության ոլորտում լայնածավալ սահմանափակումների մասին, ինչը Թրամփին դրդել էր սպառնալ Չինաստանից ներմուծման համար 100 տոկոսանոց մաքսատուրքերով՝ որպես պատասխան միջոց։

Նախատեսվում է Թրամփի ելույթը ԱՄՆ ռազմածովային ուժերի USS George Washington ավիակիրի վրա, որը կայանված է Յոկոսուկայի ռազմածովային բազայում։ Նա նաև կճաշի բիզնես առաջնորդների հետ, որոնց թվում, հավանաբար, կլինի նաև Toyota ընկերության նախագահը։

Մինչ այս, ԱՄՆ նախագահը Մալայզիայում էր, նախատեսվում է նաև նրա հանդիպումը Չինաստանի գործընկեր Սի Ցզինպինի հետ, որը տեղի կունենա հինգշաբթի՝ Հարավային Կորեայում։

Թրամփը հայտարարել է, որ պատրաստ է երկարաձգել իր ուղևորությունը՝ Հյուսիսային Կորեայի առաջնորդ Կիմ Չեն Ընի հետ հանդիպելու համար, չնայած նման հանդիպման մասին տեղեկություն դեռևս չի հայտարարվել։

Թարգմանությունը՝ Էմմա Չոբանյանի