07.03.2026 | 13:02
«Տենանք` կարո՞ւմ ենք մի բան անենք». Փաշինյանը Թալինում քաղաքացիների բնակարաններ է մտնում. ՏԵՍԱՆՅՈՒԹ
Ադրբեջանի պատվիրակությունը չի մասնակցի Երևանում կայանալիք Եվրանեսթ ԽՎ նստաշրջանին
Քաղաքականություն
27.10.2025 | 14:12
Ադրբեջանի խորհրդարանական պատվիրակությունը չի մասնակցի Եվրանեսթ Խորհրդարանական վեհաժողովի 12-րդ լիագումար նստաշրջանին, որը տեղի է ունենալու հոկտեմբերի 28-ից 30-ը Երևանում։ Այս մասին հայտարարել է Եվրանեսթում ադրբեջանական պատվիրակության ղեկավար Թահիր Միրկիշիլին, գրում են ադրբեջանական լրատվամիջոցները։
Նրա խոսքով՝ Եվրախորհրդարանի փաստաթղթերն ու հայտարարությունները, որոնք կազմում են Եվրանեսթ ԽՎ-ի գործունեության կեսը, հակասում են Ադրբեջանի ինքնիշխանությանը և տարածքային ամբողջականությանը։
«Այդ հայտարարությունները նաև չեն աջակցում տարածաշրջանում Ադրբեջանի և Հայաստանի միջև խաղաղության գործընթացին։ Ընդհակառակը, ջուր են լցնում այն ուժերի ջրաղացին, որոնք շահագրգռված են տարածաշրջանում թշնամանքի շարունակմամբ։ Միլլի Մեջլիսը բազմիցս այդ մասին բողոք է հայտնել։ Այս տարվա օգոստոսին Վաշինգտոնում Ադրբեջանի նախագահի և Հայաստանի վարչապետի միջև խաղաղության հանդիպումից հետո Եվրախորհրդարանի կողմից արված ոչ կառուցողական հայտարարությունը, որը դրականորեն ընդունվեց ամբողջ աշխարհում, կրկին խաթարել է ադրբեջանական պատվիրակության վստահությունը Եվրանեսթի ԽՎ-ի շրջանակում այս կազմակերպության հետ համագործակցության առավելությունների նկատմամբ։ Այդ պատճառներով մենք չենք մասնակցի Երևանում կայանալիք լիագումար նիստին։ Մենք մեր առարկությունները փոխանցել ենք նաև կազմակերպության ղեկավարությանը»,- ասել է Միրկիշիլին։
Ադրբեջանցի պաշտոնյան հավելել է՝ որոշումը կապված չէ նստաշրջանը Հայաստանում անցկացնելու հետ։
«Ցանկանում եմ ընդգծել, որ այս որոշումը կապված չէ այն փաստի հետ, որ միջոցառումն անցկացվում է Հայաստանում։ Այսօր Ադրբեջանի և Հայաստանի միջև խաղաղությունն արդեն իսկ ապահովված է, և գործնական քայլեր են ձեռնարկվում հարաբերությունները կարգավորելու համար»,- ասել է նա։
Հավելենք, որ ավելի վաղ էլ Վրաստանն էր հրաժարվել մասնակցել Երևանում կայանալիք Եվրանեսթ ԽՎ-ի աշխատանքներին։
Թարգմանությունը՝ Էմմա Չոբանյանի
