12.01.2026 | 12:53
Բոլորը պահանջում են արդարություն ու արդարադատություն, իսկ ի՞նչ են դրանք․ Նիկոլ Փաշինյան․ ՏԵՍԱՆՅՈՒԹ
Թրամփը հայտարարել է, որ ցանկանում է հանդիպել Կիմ Չեն Ընի հետ
Քաղաքականություն
25.10.2025 | 17:22
ԱՄՆ նախագահը, մեկնելով Ասիա, նախագահական ինքնաթիռում լրագրողներին հայտնել է, որ կցանկանար հանդիպել Հյուսիսային Կորեայի առաջնորդ Կիմ Չեն Ընի հետ։ ԿԺԴՀ առաջնորդն ավելի վաղ ևս չէր բացառել նրանց նոր հանդիպումը, որը, եթե կայանա, կլինի արդեն չորրորդը։ Նախորդ հանդիպումները չէին բերել Վաշինգտոնի ցանկալի արդյունքին՝ Հյուսիսային Կորեայի ապամիջուկայնացման հարցում, փոխանցում է BBC-ն։
«Այո, կցանկանայի։ Եթե ցանկանում եք, կարող եք դա փոխանցել, ես բաց եմ հանդիպման համար», -ասել է Թրամփը՝ հավելելով, որ իր «արտակարգ լավ հարաբերություններ» ունի Կիմի հետ։
Մալայզիա, Ճապոնիա և Հարավային Կորեա իր այցի ընթացքում Թրամփը հանդիպելու է մի շարք համաշխարհային առաջնորդների հետ, այդ թվում՝ Չինաստանի նախագահի։ Շրջագայությունը տեղի է ունենում մաքսային պատերազմի ֆոնին, որը այս տարի սկսել է ԱՄՆ նախագահը, այդ թվում՝ Չինաստանի նկատմամբ։
Թրամփը հայտարարել է Չինաստանից ներկրվող ապրանքների վրա լրացուցիչ 100% մաքսատուրքեր սահմանելու մասին։
Թրամփը արդեն հանդիպել է Կիմ Չեն Ընի հետ և մտել պատմության մեջ՝ որպես ԱՄՆ առաջին պաշտոնավարող նախագահ, ով ոտք է դրել Հյուսիսային Կորեայի տարածք։ 2019 թվականի հունիսի 30-ին ղեկավարները ձեռք են սեղմել ԿԺԴՀ-ի և Հարավային Կորեայի միջև գտնվող ապառազմականացված գծի վրա։
Նրանց առաջին հանդիպումը կայացել է Սինգապուրում՝ 2018 թվականի հունիսի 12-ին, որի ընթացքում ԱՄՆ-ի և Հյուսիսային Կորեայի առաջնորդները ստորագրել էին համատեղ փաստաթուղթ։ Այն ժամանակ Փհենյանը պարտավորվել էր ապամիջուկայնացնել Կորեական թերակղզին՝ Վաշինգտոնի կողմից անվտանգության երաշխիքներ ստանալու փոխարեն։ Թրամփի և Կիմ Չեն Ընի երկրորդ գագաթնաժողովը տեղի էր ունեցել Հանոյում՝ 2019 թվականի փետրվարի 27-ին։
