«Ռուսները չափազանց շատ բան են ուզել». Բուդապեշտում նախանշված Պուտին-Թրամփ հանդիպման նախապատրաստական ​​աշխատանքները դադարեցվել են. ԶԼՄ-ներ

ԱՄՆ պետքարտուղար Մարկո Ռուբիոյի և Ռուսաստանի արտգործնախարար Սերգեյ Լավրովի միջև հեռախոսազրույցն «արդյունավետ է եղել», սակայն Դոնալդ Թրամփը կարծում է, որ «երկու կողմերն էլ դեռևս բավականաչափ պատրաստ չեն բանակցելու՝ առաջ շարժվելու համար»։ Այս մասին հայտնել է NBC News-ի թղթակից Գարեթ Հաակեն՝ հղում անելով Սպիտակ տան բարձրաստիճան պաշտոնյայի։

Reuters-ի աղբյուրներն էլ հայտնել են, որ առաջնորդների հանդիպումը «դադարի վրա է»՝ Կրեմլի կողմից Ուկրաինայում հրադադարի վերաբերյալ անհապաղ համաձայնության չգալու պատճառով։

«Ենթադրում եմ՝ ռուսները չափազանց շատ բան էին ուզում, և ամերիկացիների համար պարզ դարձավ, որ Թրամփը չի կարողանա համաձայնության գալ Բուդապեշտում»,- լրագրողներին ասել է դիվանագետներից մեկը։

Ավելի վաղ հաղորդվել էր, որ ԱՄՆ պետքարտուղար Մարկո Ռուբիոյի և Ռուսաստանի արտաքին գործերի նախարար Սերգեյ Լավրովի միջև այս շաբաթ նախատեսված հանդիպումը հետաձգվել է։ CNN-ի աղբյուրը հայտնել է, որ Ռուբիոն և Լավրովը «տարբեր սպասումներ» ունեն Ուկրաինայում պատերազմի հնարավոր ավարտի վերաբերյալ։ Reuters-ը հայտնել է, որ Ռուբիոն և Լավրովը պլանավորել էին հանդիպել հոկտեմբերի 23-ին։

Հոկտեմբերի 16-ին Թրամփը հայտարարել էր Բուդապեշտում Վլադիմիր Պուտինի հետ հանդիպման նախապատրաստման մասին՝ Ռուսաստանի առաջնորդի հետ երկժամյա հեռախոսազրույցից հետո:

Ավելի ուշ Թրամփը լրագրողներին ասել էր, որ Ուկրաինան և Ռուսաստանը պետք է կանգ առնեն ներկայիս առաջնագծում: Երբ Թրամփին հարցրել էին, թե ինչ պետք է անել Դոնբասում, նա պատասխանել էր, որ ամեն ինչ պետք է թողնել «ինչպես կա»:

Հետո Լավրովը հայտարարել էր, որ հրադադարի կոչերը հակասում են Ալյասկայի համաձայնություններին։

Թարգմանությունը՝ Էմմա Չոբանյանի