Ռուսական էներգակիրները գնող երկրների շահերը պետք է հաշվի առնել․ Կրեմլը՝ Թրամփի հայտարարություններին ի պատասխան

Ռուսական էներգետիկ ռեսուրսների գնման հարցում պետք է հաշվի առնել այն երկրների դիրքորոշումը, որոնց համար շահավետ է դրանք Ռուսաստանից գնել։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտերֆաքսը։

«Նախագահ Թրամփը բազմիցս հայտարարել է, որ մտադիր է համոզել երկրներին՝ չգնել ռուսական նավթ, բայց այդ երկրների դիրքորոշումները նույնպես պետք է հաշվի առնվեն։ Դա այդ երկրների ժողովուրդների օգուտի հարցն է։ Երկրները ցանկանում են գնել բարձրորակ արտադրանք ավելի քիչ գումարով, և Ռուսաստանը կարող է դա առաջարկել»,- լրագրողներին ասել է Պեսկովը։

Նա հավելել է, որ եթե երկրները զրկվում են այդ իրավունքից, ազատ առևտրի սկզբունքները խախտվում են։

«Ես նույնիսկ չեմ խոսում ԱՀԿ սկզբունքների մասին, դրանք ընդհանրապես չեն մնացել։ Իսկապես անհասկանալի է, թե ինչ է անում այս կազմակերպությունն այժմ. այն պարզապես ուրիշ անելիք չունի»,- ասել է Կրեմլի խոսնակը։

Ավելի վաղ ԱՄՆ նախագահ Դոնալդ Թրամփը հայտարարել էր, որ Հնդկաստանի վարչապետ Նարենդրա Մոդին իրեն խոստացել է դադարեցնել ռուսական նավթի գնումը։ Թրամփի խոսքով՝ «հիմա Չինաստանը պետք է նույնն անի»։

Ի պատասխան Թրամփի հայտարարություններին՝ Հնդկաստանի արտաքին գործերի նախարարությունն ընդգծել էր, որ երկրի իշխանությունները նավթի և գազի գնումների վերաբերյալ որոշումներ կայացնելիս առաջնահերթություն են տալիս հնդիկ սպառողների շահերի պաշտպանությանը։

Իր հերթին, Չինաստանի արտաքին գործերի նախարարության խոսնակ Լին Ցզյանը հայտարարել է, որ Պեկինը «առևտրի և էներգետիկայի ոլորտում այլ երկրների, այդ թվում՝ Ռուսաստանի հետ համագործակցությունը» համարում է օրինական, և որ Վաշինգտոնի դիրքորոշումն այս հարցում բացասաբար է անդրադառնում միջազգային առևտրի վրա։

Թարգմանությունը՝ Էմմա Չոբանյանի