Գոդ Նիսանովը, Վագիդ Ալեքպերովը և մի շարք այլ ադրբեջանցիներ Բրիտաինայի սահմանած պատժամիջոցների ցուցակում են

Մեծ Բրիտանիայի ֆինանսների նախարարությունը հայտարարել է Ռուսաստանի դեմ պատժամիջոցների ընդլայնման մասին։ Սահմանափակումները վերաբերում են «Ռոսնեֆտ»-ին և «Լուկօյլ»-ին, դրանց հետ կապված կազմակերպություններին Չինաստանում, Հնդկաստանում և ԱՄԷ-ում, ինչպես նաև «ստվերային նավատորմին» պատկանող 51 լցանավի և մի քանի բանկերի։

Պատժամիջոցների տակ են հայտնվել, ընդհանուր առմամբ, 90 անհատներ և կազմակերպություններ: Նոր պատժամիջոցները ներառում են ակտիվների սառեցում, ճանապարհորդության արգելքներ ու մի շարք այլ սահմանափակումներ։

Ադրբեջանական լրատվամիջոցները հայտնում են, որ Մեծ Բրիտանիայի կողմից հրապարակված ցուցակում կան նաև մի շարք ադրբեջանցի գործարարների անուններ։ Նրանց թվում են Վագիդ Ալեքպերովը՝ «Լուկօյլ»-ի նախագահ, Գոդ Նիսանովը՝ «Կիևսկայա պլոշչադ» ընկերության տնօրենների խորհրդի նախագահ, Զախար Իլիևը՝ Նիսանովի հետ գործարար կապերի համար է պատժամիջոցների ցուցակում։

Ցուցակում հայտնվել են նաև Ահմադ Քարիմովը, Անար Մադաթլին, Թալաթ Սաֆարովը, Էթիբար Էյուբը, Թահիր Գարաևը՝ «Coral Energy Group» նավթային առևտրային ընկերության ղեկավարներ, Շանլիկ Շյուքուրովը՝ Թուրքիայում գրանցված «Մաստել Մակինա» ընկերության ներկայացուցիչ։ Եվս մեկ ադրբեջանցի՝ նախկին բանտապետ Ֆիքրեթ Թաղիևը, մեղադրվում է փաստաբան Սերգեյ Մագնիտսկու մահվան մեջ։

Մեծ Բրիտանիայի կառավարությունը Թաղիևին պատասխանատու է համարում Սերգեյ Մագնիտսկու նկատմամբ 2009 թվականին «Մատրոսսկայա տիշինա» կալանավայրում նրա մահից առաջ ցուցաբերված վատ վերաբերմունքի համար և  մեղադրում մահվան հանգամանքների վերաբերյալ ապացույցները թաքցնելու մեջ։

Թարգմանությունը՝ Էմմա Չոբանյանի