31.10.2026 | 22:55
Հայտնաբերվել է զինծառայողի դի. ՊՆ
ՌԴ-ն հրաժարվում է կատարել Վրաստանին 253 մլն եվրո վճարելու ՄԻԵԴ որոշումը
15.10.2025 | 16:25
Ռուսաստանը չի կատարի Մարդու իրավունքների եվրոպական դատարանի (ՄԻԵԴ) որոշումը Վրաստանին փոխհատուցում վճարելու հետ կապված։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտերֆաքսը։
«Դա առանձին թեմա է։ Մենք չենք կիրականացնի որոշումը», – ասել է նա՝ մեկնաբանելով ՄԻԵԴ-ի որոշումը, որը Ռուսաստանին պարտավորեցրել է Վրաստանին վճարել 253 միլիոն եվրո՝ կապված 2008 թվականի ռազմական գործողությունների հետ։
Հոկտեմբերի 14-ին ՄԻԵԴ-ը բավարարել էր Վրաստանի պետական հայցը Ռուսաստանի դեմ՝ վրացական կողմի օգտին որոշելով 253 միլիոն եվրոյի փոխհատուցում 2008 թվականի հակամարտությունից հետո մարդու իրավունքների խախտումների համար: Հայցը ներկայացվել էր 2018 թվականին:
2022 թվականի մարտի 15-ին Ռուսաստանի արտաքին գործերի նախարարությունը հայտարարել էր երկրի՝ Եվրոպայի խորհրդից դուրս գալու մասին։ 2022 թվականի հունիսին նախագահ Վլադիմիր Պուտինը ստորագրել էր օրենք, որով սահմանվում է, որ 2022 թվականի մարտի 15-ից, այսինքն՝ Եվրոպայի խորհրդում Ռուսաստանի մանդատի դադարեցումից հետո ՄԻԵԴ-ի կայացրած որոշումներն այլևս չեն կարող կիրառվել Ռուսաստանում։
Թարգմանությունը՝ Էմմա Չոբանյանի
