16.02.2026 | 23:24
Այրվել են պահեստային բաքերը և բեռնատար մեքենա. մանրամասներ Թալինի գազալցակայաններից մեկում բռնկված հրդեհից
ԱՄՆ-ում ՌԴ դեսպանատունը Քենեդիի սպանությանը վերաբերող 350 էջ արխիվային փաստաթղթեր է փոխանցել ամերիկացի սենատորին
Քաղաքականություն
15.10.2025 | 21:19
Վաշինգտոնում Ռուսաստանի դեսպանատունը հանրապետական սենատոր Աննա Պաուլինա Լունային է փոխանցել ԱՄՆ 35-րդ նախագահ Ջոն Քենեդիի սպանության վերաբերյալ արխիվային փաստաթղթեր, գրում է Meduza-ն։
Աննա Պաուլինա Լունան, որը Ռուսաստանի դեսպան Ալեքսանդր Դարչիևից ստացել է 350 էջանոց փաստաթղթերը, հայտարարել է փոխանցման մասին:
«Փորձագետների խումբ է ուղարկվում իմ գրասենյակ՝ փաստաթղթերի թարգմանությունը և լիարժեք վերլուծությունը սկսելու համար: Մենք նյութերը կհրապարակենք հնարավորինս շուտ»,- գրել է նա:
Սենատորի խոսքով՝ Կոնգրեսը փորձել է ստանալ այդ փաստաթղթերը դեռևս 1990-ականներին, բայց մերժվել է: Այժմ դրանց հասանելիությունը տրամադրվում է «պատմության մեջ առաջին անգամ»:
Ռուսաստանի դեսպանատունը հաստատել է, որ սենատորի խնդրանքով փոխանցել են արխիվային փաստաթղթերի հավաքածուն, որը «պաշտոնապես կհրապարակվի Ռուսաստանում նոյեմբերին»։
«Սա հանրությանը լրացուցիչ հասանելիություն կապահովի սպանության ողբերգական հանգամանքների վերաբերյալ նյութերին»,- հայտարարել են դեսպանատնից։
Նշվում է, որ այդ փաստաթղթերից շատերը ներկայացվել են Քենեդիի հուղարկավորության ժամանակ խորհրդային ներկայացուցիչ Անաստաս Միկոյանի կողմից։
Ջոն Քենեդին սպանվել է Դալլասում 1963 թվականի նոյեմբերի 22-ին, երբ կնոջ՝ Ժակլին Քենեդիի հետ նստած էր բաց նախագահական լիմուզինում։ Հետաքննությունը եզրակացրել է, որ Քենեդիի վրա կրակել է նախկին ծովային հետևակային Լի Հարվի Օսվալդը՝ գործելով միայնակ։ Օսվալդը նախկինում մոտ երեք տարի ապրել է ԽՍՀՄ-ում։ Նա ձերբակալվել է սպանությունից գրեթե անմիջապես հետո, իսկ երկու օր անց, երբ ոստիկանությունը նրան ուղեկցում էր մեկ այլ բանտ տեղափոխվելու համար, ամբոխի կողմից կրակոց է արձակվել նրա որովայնին։ Օսվալդը մահացել է հիվանդանոցում։
2024 թվականին նախագահ ընտրվելուց հետո Դոնալդ Թրամփը ստորագրել էր գործադիր հրամանագիր Ջոն Քենեդիի սպանությանը վերաբերող փաստաթղթերի հրապարակման վերաբերյալ: Փաստաթղթերի մեծ մասն արդեն հրապարակվել է, սակայն ԿՀՎ-ն, Պենտագոնը և Պետքարտուղարությունը հրաժարվել են որոշ փաստաթղթեր հրապարակել՝ անվտանգության նկատառումներից ելնելով:
Թարգմանությունը՝ Էմմա Չոբանյանի
